சூனா பானா வீணா போனவரின் மடலுக்கு பதில்...

சூனா பானா வீணா போனவர் அப்பா மணியரசனுக்கு மடல் எழுதியுள்ளார் பொதுவெளியில், அதற்கான பதிலை கொடுக்க தகுதியானவர் அப்பா மணியரசன் தான் ஆனால் எனக்கும் பதில் அளிக்க வேண்டும் என்று தோன்றுகிறது காரணம்.. நான் கேட்கும் சுதந்திர போராட்டத்தை பேசும் அதாவது தமிழ் நாட்டின் சுதந்திர போராட்டத்தை பற்றி மட்டும் பேசுபவர் அதற்காக உழைப்பவர் எத்தனை பேர் தன் பின்னால் இருக்கிறார்கள் என்று பார்க்காமல் எத்தனை பேரை தன் பின்னால் கொண்டு வந்து தமிழ்நாட்டின் சுதந்திரபோராட்டத்தை முன்னெடுக்க முடியும் என்று போராடி வருபவர் என்பதால்...

சூனா பானா வீணாவின் கட்டுரையை படியுங்கள் முதலில்...
http://subavee.com

சூனா பானா வீணா போனவர் எழுப்பிய ஏழு கேள்விகளுள் ஏழாவது கேள்விக்கு நான் பதில் அளித்துவிட்டேன்.. எனது முதல் பத்தியிலேயே அதாவது என்னால் சுதந்திர போராட்டத்தை பற்றி பேச முடியாது என்னுடன் இருப்பவர்கள் எண்ணிக்கை மிகவும் குறைவு என்று தனது ஆற்றாமையை ஒத்துக் கொண்டதாக தோணலாம் சூனா பானாவின் பதில் ஆனால் அது அல்ல பதில் இந்திய சுதந்திரப் போராட்டம் என்று தொடங்கியது என்ற வரலாறு தெரியாமல் அது மிகப்பெரும் கூட்டமாக மாறிய பிறகு நடந்த போராட்டங்களை வைத்தே இந்திய சுதந்திர போராட்டத்தை படித்து வந்த சூனா பானா வீணா போனவர் சுதந்திர போராட்டத்தின் விதை ஒட்டுமொத்த மக்களின் கூடலில் நிறைவடைகிறது ஆனால் தொடக்கம் கருத்தியல் என்பதை உணராதவராகவே தெரிகிறது..

சரி ஏழு கேள்வியில் கடைசிக் கேள்விக்கு பதில் அளித்தாகிவிட்டது மற்ற கேள்விகள் என்ன செய்வது. ஆமாம் அதுவும் முக்கியம் தான் அந்த கேள்விகளின் அடிப்படை முள்ளிவாய்க்கால் முற்றத்தை சுற்றியே இருக்கிறது. முதலில் இவர் புரிந்து கொள்ள வேண்டியது முள்ளிவாய்க்கால் முற்றத்தை மக்களின் பார்வைக்காக திறந்தது ஒரு விழா அல்ல என் வீட்டில் ஈழவு விழுந்திருக்கிறது வாருங்கள் என்று சொன்ன கருமாதி பத்திரிக்கை. அதாவது சூனா பானா எதிர்பார்ப்பது என்னவென்றால் ஈழவு வீட்டிற்கு கருமாதி பத்திரிக்கை வைத்து அழைக்க வேண்டும் என்பது.. அப்படி அழைக்காவிடில் அதில் அது குற்றம் இது குற்றம் என்று சொல்வது..

குற்றம் கண்டுபிடித்தே வாழும் இனத்திற்கு மாறாக இவர் செயல் பட முடியுமா என்ன அதை தொடரத்தானே வேண்டும்.. நான் இனம் என்று சொன்னது திருவிளையாடல் என்ற கட்டுக்கதையில் வந்த நக்கீரன் இனத்தைப் பற்றி. கட்டுகதைகளை நம்பி ஏமாந்து இன்று பகுத்தறிவாளனாக இருந்தாலும் மற்றொரு பகுத்தறிவாளருக்கு கட்டுகதையை தான் உதாரணமாக கொடுக்க வேண்டியதுள்ளது எனென்றால் சூனா பானா வீணாப்போனவர் அதற்கு தான் தகுதியாக இருக்கிறார். அதாவது ஈழவு வீட்டுக்கு அழைப்பு வேண்டும் போராட்டம் நடந்தால் அதற்கு வர அழைப்பு வேண்டும் என்ற நினைப்பின் கீழ். இப்படி அழைப்பு விட்டுத் தான் நீங்கள் தமிழின மீட்சிக்காக பாடுபடுவீர்கள் என்றால் போராளியாக அறிமுகப்படுத்திக் கொள்ளாதீர்கள், மிஞ்சிப்போன சொந்தமாக விலகி நில்லுங்கள்..

இழவு வீடு இழவு வீடு தான் அதற்கு அழைப்பு வைப்பது அனைவருக்கும் முடியாது, அழைக்காமல் வந்த ஆயிரக்கணக்கான சொந்தங்களுடன் கலந்து கொண்ட எம்மை போன்ற பொதுமக்களுக்கு அது போதுமானது..         

சீக்கிய சகோதரர்களின் தளராத பதிலடி

உலகில் சிலர் மட்டும் தங்கள் தனி தன்மையை விட்டுக் கொடுத்தது இல்லை, தமிழ் மொழி பேசும் நாம் எங்கிருந்தாலும் நம் மொழியை நமது பண்பாட்டை விட்டுக்கொடுத்தது இல்லை. அதன் தனித் தன்மையுடனேயே இயங்கி வருகிறோம் அதே போல் தான் சீக்கிய சகோதரர்களும் அவர்களும் தங்கள் தனிதன்மையுடன் தொடர்ந்து வருபவர்கள் உலகின் எந்த மூளையில் இருந்தாலும். அவர்களின் மிகமுக்கியமான ஒரு இடம் அமிர்தசரஸில் உள்ள பொற்கோயில் என்று நம்மால் பொதுவில் கூறப்படும் குருதுவாரா ஸ்ரீ ஹரிமிந்தர் சாகிப், எத்தனையோ மன்னர்கால படையெடுப்புகளையும், ஜனநாயகம் என்ற பெயரில் சர்வாதிகார தாக்குதலையும் தாண்டி இன்றும் உயர்ந்து நிற்கும் ஒரு கோயில் தான் பொற்கோயில்.

தங்களின் குருத்வாராவிற்கு எந்த ஆபத்து வந்தாலும் அதை சகித்துக் கொள்வதில்லை இவர்கள் இதை மதவெறியாக நமக்கு தெரிந்தாலும். சீக்கியர் எனும் இனமே ஒரு மதத்தின் அடிப்படையிலேயே கட்டமைக்கப்பட்டுள்ளது. இவர்களையும் இந்துக்களாக மாற்றுவதற்கு பல்லாண்டு காலமாக முயற்சிகள் நடந்து கொண்டுள்ளது. ஆனால் இவர்களின் தனித்தன்மை என்றும் அந்த முயற்சிகளுக்கு பணிந்து போய்விடவில்லை.

1700களில் முகலாயர்களின் படையெடுப்புகளின் போது குருத்துவரா பெரிதும் தாக்குதலுக்கு உள்ளானது அப்படி ஒவ்வொரு முறை தாக்குதலுக்கு உள்ளன பொழுதெல்லாம் யார் தாக்குதல் நடத்தினார்களோ அவர்களை திரும்பவும் தாக்கி அழித்திருக்கின்றனர். 

தமிழர்களான நமக்கு எதிரான எத்தனை நடவடிக்கைகள் எடுக்கப்பட்டாலும் அதற்கான ஜனநாயக எதிர்நிலையைக் கூட நாம் உடனடியாக காட்டுவதில்லை.. 

எது தமிழ்த் தேசியம்..

வட்டுக்கோட்டை தீர்மானத்தின் மூன்றாவது நான்காவது சரத்துகள் சிலருக்காக.. 

(இ) தமிழ் ஈழம் அவ்வரசிலுள்ள மக்கள் சார்ந்திருக்கக்கூடிய எல்லாச்சமயங்களுக்கும் சமமான பாதுகாப்பும் உதவியும் வழங்குகின்ற சமயச்சார்பற்ற ஓர் அரசாக இருக்க வேண்டும்.

(ஈ) தமிழ் அரச மொழியாக இருக்க வேண்டும் எனினும் தமிழ் ஈழத்தில் சிங்களம் பேசுகின்ற சிறுபான்மைகள் அவர்களின் மொழியில் கல்வியையும் அலுவல்களையும் தொடர்வதற்கான உரிமைகள் சிங்கள அரசிலுள்ள தமிழ் பேசும் சிறுபான்மைகள் பாதுகாக்கப்படும் சரி எதிரிடையான அடிப்படையில் பாதுகாக்கப்பட வேண்டும்.

இதில் சொல்வது ஒன்று தான் தமிழீழத்தில் வாழும் மக்கள் சிங்கள அரசின் கீழ் வாழும் தமிழ் மக்களைப் போன்று இல்லாமல் எதிரிடையான அடிப்படையில் பாதுகாக்கப்பட வேண்டும் என்பது. அதாவது தமிழீழத்தில் காலம் காலமாக வாழும் சிங்களவர்கள் அவர்களின் முழு மொழி மற்றும் மத உரிமையுடன் வாழ வழி வகை செய்ய வேண்டும் என்பது. அதாவது தமிழீழத்தில் இருக்கும் தமிழர்களுக்கு என்ன உரிமை உண்டோ அத்தனையுடனும் சிங்களர்களுக்கும் வாழும் வகையை ஏற்படுத்திக் கொடுப்பது. 

இந்த வட்டுக்கோட்டை தீர்மானத்தின் அடிப்படையிலேயே தமிழீழ சுதந்திரப் போராட்டம் தொடங்கியது. ஆனால் அந்த தமிழீழ சுதந்திரப் போராட்டம் நசுக்கப்பட்ட பொழுது அரசியலுக்கு வந்தவர்கள் எல்லாம் இப்பொழுது பேசுவது இனவாதமாக மாறிக் கொண்டுள்ளது. எப்படி சிங்கள பெளத்த பேரின வாதம் தமிழர்களை ஒடுக்கியதோ அதே போன்ற கருத்தியலாக்க்கங்கள் உருவாக்கப்பட்ட வருகிறது.  தமிழன் தான் தமிழனை ஆள வேண்டும் என்பது அல்ல தமிழ் தேசியம் தமிழ் தேசிய இனம் எப்படி ஒடுக்குமுறைக்கு உள்ளானதோ அந்த ஒடுக்குமுறைகளை உடைத்து எரிந்து மேல் வருவதும். ஒடுக்குமுறைக்கு உள்ளான மக்கள் அந்த ஒடுக்கு முறையை உணர்ந்து மற்றவர்களையும் ஒடுக்கு முறைக்கு உள்ளாக்காமல் அமையும் இறையாண்மையே தமிழ்த் தேசியம். 

தமிழ்த் தேசியம் என்பதன் வரையறை திராவிடத்தை எதிர்ப்பதிலோ இந்தியத்தை எதிர்ப்பதிலோ இல்லை. தமிழ்த் தேசியத்தை அனைவரும் ஏற்றுக் கொள்ளும் வகையில் கட்டமைகக்பட வேண்டும். அப்படி ஒரு அடிப்படை கட்டமைப்பு அதன் அடிப்படை கருத்தியலாக்கம் அனைவருக்குமான உரிமைகளையும் பாதுகாக்கும் நோக்கத்துடன் அமையவேண்டும். அதைவிடுத்து ஆழ்ந்த கருத்தாலமில்லாத தமிழனை தமிழன் ஆண்டால் போதும் அனைத்தும் கிடைத்துவிடும் என்ற மேம்போக்கான கருத்தியலாக்கம், நம்மையும் ஒரு பேரினவாதியாக கொண்டு நிறுத்தும். 

தமிழனை தமிழன் பல்லாண்டுகாலமாக ஆண்டு வந்துள்ளான், கிமு கிபி என்று ஆயிரம் ஆண்டுகளுக்கும் மேலாக ஆண்டு வந்திருக்கிறார்கள். இவர்களின் ஆட்சியில் தான் ஆரிய கட்டமைப்பு நமக்குள் செலுத்தப்பட்டு சாதியமாகவும் பிரிந்து நிற்கிறோம். வலங்கை இடங்கை சாதி சண்டைகளே கிமுவில் தொடங்கி கிபி வரை நீண்டு இருந்திருக்கிறது. இது வரி வசூழிக்கும் வேலை செய்தவர்களுக்கும் வரி கொடுப்போருக்கும் இடையிலான சண்டை, பின்னர் ஆண்டான் அடிமை சண்டையாக பிற்காலத்தில் வடிவமெடுத்தது அதில் அடிமையாக இருந்த சாதிகள் எல்லாம் மேலே வந்தும் இருக்கின்றன ஆண்ட சாதிகள் எல்லாம் கீழேயும் தள்ளப்பட்டு இருக்கின்றன. இப்படி நம்மை ஒடுக்க நமக்குள் பிரிவினைகள் தோற்றுவித்து அதை வளர்த்தெடுத்த பொழுது ஆண்ட மன்னர்களும் தமிழர்களே. 

கருத்தியலாக்கம் என்பது காலத்திற்கும் நிற்கும் கருத்துகளின் அடிப்படையில் அமைய வேண்டியதுள்ளது அதைவிடுத்து முதலில் தமிழனை தமிழன் ஆள வேண்டும் அடுத்து அடுத்த படி என்று செல்வது அல்ல. முதலில் முடிவெடுக்க வேண்டியது தமிழ்த் தேசியத்தின் அடிப்படை வரையறைகள். இவைகள் இல்லாமல் அடுத்தப்படியை பற்றி நாம் யோசித்தாலும் அதை நம்பி நம்மோடு இருப்பவரே வரத் தயங்குவர். தமிழ் தேசியம் என்பது தமிழர்களுக்கான தேசியம் அதை ஆள்பவர்கள் தமிழர்களாக இருக்க வேண்டும் தமிழனாக இருப்பது மட்டுமே முக்கியம் இல்லை. ஒரு தமிழன் ஆள வேண்டும் என்பதற்கு தமிழர்கள் ஆளவேண்டும் என்பதற்கு பல்வகை வேறுபாடுகள் உண்டு,

ஹிட்லரைப் மனப்பாங்கை கொண்ட ஒரு தமிழனும் ஆள வரலாம் என்பது அல்ல தமிழ்த் தேசியம், தமிழர்களுக்கானது தமிழ்த் தேசியம். அதில் ஒடுக்கப்பட்ட தமிழன் மற்றவர்களை ஒடுக்குவது அல்ல தமிழ் தேசியம் அனைவருக்குமான தமிழகத்தை கட்டி அமைப்பதே தமிழ்த் தேசியம்.. இதற்கான வரையறையை ஈழத்தமிழர்கள் 1976ம் ஆண்டே நமக்கான வழி காட்டியாக அளித்து இருக்கின்றனர். இதை விடுத்து யார் தமிழன் யார் திராவிடன் என்று தேடி ஒதுக்குவது அல்ல தமிழ் தேசியம். இன்று திராவிட இயக்கம் தன்னுடைய மேலான பணியை செய்திருக்கிறது மொழிவாரி மாநிலங்கள் பிரிக்கும் முன்பாகவே, இன்றைய திராவிட இயக்கத்தின் கட்சிகளாக அடையாளம் காணப்படுபவை சந்தர்ப்பவாத கட்சிகள் திராவிடத்தை தன் பெயரில் மட்டும் தாங்கி நிற்பவை.

மேலும் மிகவும் முக்கியமானது வர்ணபேதங்களினால் பிரிக்கப்பட்டு ஆயிரம் வருடங்களுக்கு மேலாக ஒடுக்கப்பட்ட மக்களை சரிநிகரில் வைத்திருக்கும் தமிழ்த் தேசிய வரையறையும் இதில் வேண்டும். இவைகள் இல்லாமல் வெறும் தமிழன் தமிழனை ஆள வேண்டுமென்பதல்ல தமிழ்த் தேசியம் தமிழருக்காக அமைவதே தமிழ்த் தேசியம். இதைத் தான் சிங்களர்களுக்கும் முழு உரிமை கொடுத்து அமைந்தது வட்டுக்கோட்டை தீர்மானத்தில்... சிங்களவன் தமிழீழத்தை ஆளக்கூடாது என்று எங்குமே வரையறைக்கவில்லை வட்டுக்கோட்டை தீர்மானம். இதனடிப்படையிலேயே ஆயுதப் போராட்டம் தொடங்கியது தமிழனை உலகிற்கு அடையாளம் காட்டியது. சிங்களர்கள் பலரும் தமிழீழ சுதந்திரப் போராட்டத்திற்கு ஆதரவும் அளித்துள்ளனர் போராடவும் செய்துள்ளனர். இன்று இலங்கை நடத்தியது இனப்படுகொலை என்பதை வெளியுலகிற்கு தெரியவைத்துக் கொண்டிருப்பதும் சில சிங்களவர்களே..

தமிழ்த் தேசியத்தின் சண்டை நாம் போட வேண்டியது இந்திய தேசியம் என்ற இல்லாத ஒன்றை கட்டமைத்து அனைவரின் மனதிலும் வேருண்றி இருக்கும் கருத்தியலுடன் தானே ஒழிய, ஒன்றாக இருக்கும் சகோதர்களுடனானது இல்லை. இங்கு திராவிடத்தை பெயரில் மட்டும் தாங்கி நிற்கும் கட்சிகளில் சக தமிழனும் இருக்கிறான் என்பதை நாம் தெளிவாக புரிந்து கொள்ள வேண்டும். அதே போல் பலநூற்றாண்டுகளாக நம்முடன் வாழ்ந்து தன் தாய்மொழியை எழுதப்படிக்க கூட தெரியாமல் இருப்பவர்களை நாம் வந்தேறிகள் என்று ஒதுக்கினால் உலகில் அனைத்து மூலைகளிலும் ஏன் தென்னிலங்கையில் தமிழகத்தில் இருந்து குடியமர்த்தப்பட்டு அந்த நாட்டின் வளத்திற்கு நூற்றாண்டுகளாக உழைத்த மலையகத் தமிழர்களையும் சேர்த்து அனைவரையும் அவர்கள் வந்தேறிகள் என்று சொல்வதை ஒத்துக் கொண்டு திரும்ப அழைத்து வரவேண்டும். இதற்கு நாம் தயராக இருக்கலாம் ஆனால் ஆண்டாண்டுகளாக தன்னுடைய இடம், மண் என்று பிறந்து வளர்ந்த அவர்கள் ஒத்துக் கொள்ள மாட்டார்கள்.

தமிழினம் என்பது மானுடத்தை மதிக்கும் இனமாக இருப்பது தான் தமிழுக்கான பெருமை... உலகிற்கு வாழக் கற்றுக் கொடுத்தவர்கள் இன்று தமிழர்கள் அவர்கள் வாழும் இடத்தில் உரிமைகள் பறிக்கப்படும் பொழுது அதை எதிர்த்து குரல் கொடுக்கும் ஒரு தேசமாக உருவெடுப்பது தான் தமிழ்த் தேசியம் அதை செய்ய முன்னுதரணமாக தமிழகத்தில் தமிழ்த் தேசியம் பேசுபவர்கள் சக மொழிபேசும் தமிழகத்தில் வாழ்பவர்களை தூற்றுவதல்ல தமிழ்த் தேசியம்.

முழுமையா வட்டுக்கோட்டை தீர்மனத்தை படிக்க கீழே இருக்கும் இணைப்பை உபயோகிக்கவும்...
http://www.tamilvalg.dk/tamil/?page_id=15

இந்திய இராணுவம் இலங்கையின் அடியாள்..

இந்தியாவும் இலங்கையும் இனப்படுகொலை பங்காளிகள் என்பதை 2009ம் ஆண்டில் இருந்து தொடர்ந்து சொல்லி வருகிறோம். ஆனால் இவர்களின் கூட்டு படுகொலைகள் 1971ம் ஆண்டில் இருந்தே தொடர்ந்து செய்து வருகின்றனர். ஆம் ஜனதா விமுக்தி பெரமுனா எனும் பொதுவுடமை அமைப்பு இலங்கையில் தோன்றி பொதுவுடமை தத்துவத்தை மக்களிடம் பரப்பி வெகு வேகமாக வளர்ந்த அமைப்பு. இந்த அமைப்பினர் தான் முதன் முதலில் ஆயுத போராட்டத்தை கையில் எடுத்தவர்கள். அப்படி இவர்கள் 1971ம் ஆண்டு ஏப்ரல் மாதம் தென் இலங்கை பகுதியின் பெரும்பாலன இடங்களை இலங்கை அரசின் கட்டுப்பாட்டில் இருந்து தங்கள் கட்டுப்பாட்டிற்குள் கொண்டு வந்து ஒரு மாபெரும் புரட்சியை நடத்தினார்கள். 

ஜெவிபி யை துவக்கியவர் விஜயவீரா இவர் முதலில் சிலோன் பொதுவுடமை கட்சியில் இருந்தார். ரஸ்யாவில் மருத்துவம் படிக்க ஸ்காலர்சீப் கிடைத்து சென்று படித்தார், ஆண்டு விடுமுறைக்கு இலங்கை வந்து திரும்ப முயன்ற பொழுது விசா மறுக்கப்பட்டது. இவரது சீன கம்யூனிச ஆதரவின் காரணமாக. படிப்பை தொடர முடியாது என்று தெரிந்த பிறகு புதிதாக் ஆரம்பிக்கப்பட்ட சிலோன் பொதுவுடமை கட்சி சண்முகநாதன் தலைமையில் தொடர்ந்து முழு நேரப் பணியாக தொடர்ந்தார். அதிலிருந்து வெளியேறியே ஜெவிபியை ஆரம்பித்தார். புரட்சிகர போராட்டங்களும் புரட்சியுமே இலக்கை அடைய உண்மையான சாதனங்கள் என்று பெரிதும் நம்பியவர். அதற்காக மக்களையும் தயார் படுத்தியவர் தான் விஜயவீரா...

1971ல் ஒரே சமயத்தில் கிட்டத்தட்ட 37 காவல் நிலையங்களை கைப்பற்றினர், ஜெவிபியினர் தென் இலங்கையில் ஒரு குறிப்பிடதக்க இடங்களில் மிகப்பெரும் புரட்சியை உருவாக்கி அரசிற்கு எதிராக மக்களை நிறுத்தியிருந்தனர். இந்த புரட்சியை ஒடுக்குவது இலங்கை அரசுக்கு மிகப்பெரிய பிரச்சனையாக இருந்தது, இலங்கையிட சொல்லி கொள்ளும் அளவிற்கு இராணுவ பலம் அப்போது இல்லை, காவல்துறையினர் தான் பெருமளவு இருந்தனர் இராணுவத்தை விட. அதனால் இந்தியாவின் உதவியை நாடினர், அணிசேரக் கொள்கையை தனது நாட்டின் கொள்கையாக கொண்ட இந்தியா இலங்கை இராணுவத்துடன் இணைந்து அவர்களின் நாட்டு மக்களை படுகொலை செய்ய துணை போனது. அரசு இந்த புரட்சியில் 5000 மக்கள் வரை கொல்லப்பட்டனர் என்று தகவல் சொல்கிறது. ஆனால் புரட்சி முடிந்து கைது செய்யப்பட்டவர்கள் மட்டுமே 15000க்கும் மேலானோர். கொலை செய்யப்பட்டவர்களின் எண்ணிக்கை 45000ல் இருந்து 50000 இருக்கும் என்று கணக்கிடுகின்றனர் மனித உரிமை ஆர்வலர்கள். 

1971ல் இந்திய இராணுவ உதவியுடன் ஜெவிபியை நசுக்கினார்கள் என்றும் புரட்சிகர கருத்தகளோ போராட்டங்களோ ஒய்வதில்லை என்பதற்கு சான்றாக மறுபடியும் புரட்சி தொடங்கியது 1980களில் 1987ம் ஆண்டு இந்தியாவை அமைதி படை என்ற பெயரில் கொண்டு வந்து ஈழவிடுதலைகாக போராடியவர்களுடன் சண்டையிடச் செய்துவிட்டு இலங்கை இராணுவம் திரும்பவும் ஜெவிபியினரை மிருக வேட்டையாடியது. 1971ல் இந்தியா இலங்கை ஒரு குழுவாக நின்று மக்களை படுகொலை செய்தனர், 1988 -89 களில் இரு குழுக்களாக நின்று தங்கள் மக்களை கொலை செய்தனர். இந்திய அமைதிப்படை ஈழத்தில் பல்லாயிரக்கணக்கான அப்பாவி தமிழ் மக்களை கொண்று குவித்தது அதே சமயத்தில் தென் இலங்கையில் இலங்கை இராணுவம் ஜெவிபியினரை கொண்று குவித்தது. 

அணிசேரக் கொள்கை என்று சொன்ன இந்தியா இலங்கை இராணுவத்துடன் மட்டும் அணிசேருவது என்ன கொள்கை என்று யாரும் கேட்க கூடாது. இந்திய இராணுவத்தின் துணையுடன் 1971ல் 50000 மக்களை படுகொலை செய்துள்ளனர் இதில் சிங்களவன் தமிழர் என்பது எல்லாம் கிடையாது ஜனத விமுக்தி பெரமுனாவின் உறுப்பினர்கள், ஆதரவாளர்கள் மற்றும் நன்கொடை அளித்தவர்கள் என்று அனைவரையும் கொன்று குவித்துள்ளனர். இதற்கு இந்தியாவில் இருந்து சென்னை மற்றும் பெங்களூர்வில் இருந்து இராணுவத்தினரையும் 5 ஹெலிகாப்டர்களையும் அனுப்பி வைத்துள்ளனர். இங்கு இருந்து சென்ற ஹெலிகாப்டர்களும் வீரர்களும் காட்டுநாயகா விமான நிலையத்தில் தரையிறங்கி இலங்கை இராணுவத்துடன் இணைந்து ஒரு மனித படுகொலையை நடத்தியிருக்கின்றனர் 1971ல். 80களின் இறுதியில் இந்திய அமைதிபடை என்ற பெயரில் நடத்திய படுகொலை நாம் அறிந்ததே.. இந்திய இலங்கைக்கு ஒரு அடியாளாக செயல்பட்டு வருகிறது ஓவ்வொரு முறையும்... 

தன் சொந்த நாட்டு மக்களை கொலை செய்யும் இந்தியா மற்றும் இலங்கை போன்ற அரசுகள் மக்களுக்கான ஜனநாயக நாடுகள் என்று இறையாண்மை உள்ள நாடுகள் என்று கூறுவது அறுவெருப்பாக உள்ளது.

1971ல் இந்திய படை இலங்கைக்கு சென்றதற்கான ஆதாரம்
http://vayu-sena.indianmilitaryhistory.org/other-coin-1971-ceylon.shtml

முள்ளிவாய்க்கால் முற்றம் நெறுஞ்சி முள்???

ராஜ ராஜன் ஒரு மாபெரும் கற்றாளியை உருவாக்கினான் கிபி 10ம் நூற்றாண்டில் அது விவாதத்தின் கருப்பொருளாக இன்று வரை இருந்து வருகிறது. ஆனால் தமிழர்களின் கட்டிடக் கலைக்கு சான்றாக உலகின் முன்னாள் தன் பணியை செய்கிறது. அதே போல் முள்ளி வாய்க்கால் முற்றம் எனும் ஈழத்தில் 2009ல் நடந்த இனப்படுகொலையை எடுத்து இயம்பும் சின்னத்தை நோக்கிய விமர்சனமும் நீண்டு கொண்டே செல்கிறது ஆனால் ராஜ ராஜனின் கற்றாளியைப் போல் முற்றமும் தன் பணியை செவ்வனே செய்து கொண்டுள்ளது.

முள்ளிவாய்க்கால் ஆள்பவர்களுக்கும் ஆண்டவர்களுக்கும் மிகப் பெரிய பிரச்சனையாக இருக்க போகிறது. ஈழத்தில் நடந்த இனப்படுகொலைகளை 1980களில் இருந்து ஆரம்பித்து இன்று வரை அனைத்தையும் தன்னுள்ளே வரித்துக் கொண்டுள்ளது அங்கிருக்கும் கலை ஆவணங்கள்.

ஈழத் தமிழ் சொந்தங்களின் அமைதியான இயற்கை சார்ந்த வாழ்க்கையை பனைமரக் காட்டினுடாக வடித்த சிற்பத்தில் தொடங்கி, 1983ம் ஆண்டு குட்டி மணி தன் கண்களுக்கு கொடுக்க விரும்பிய பாக்கியமான சுதந்திர தமிழீழத்தை பார்க்க கூடாது என்று நோண்டி எடுக்கப்பட்டு அழிக்கப்பட்ட கண்களை வடித்த சிற்பமாகட்டும் பேசாமல் பேசும் கதைகள் பல. யாழ்ப்பாண நூலகத்தை எரிப்பு சம்பவத்தையும் தமிழன் கறி இங்கு கிடைக்கும் என்று நடத்தப்பட்ட சம்பவத்தை சுட்டிகாட்டுவது ஆகட்டும் அனைத்தும் மிகவும் நேர்த்தியாக கலை ஆவணமாக வடிக்கப்பட்டுள்ளது.

(யாழ்ப்பாண நூலக எரிப்பு, தமிழன் கறி நிகழ்வுகள் கலை வடிவில்)

(முள்ளிவாய்க்கால் நிகழ்வுகள் 2009ல்)

முள்ளிவாய்க்காலில் 2009ல் நடந்த கொடூரங்களை தனி தனி சிற்பங்களாக ஒரு சுவராக ஒவ்வொரு நிகழ்வும் மிகவும் நேர்த்தியாக சித்தரிக்கப்பட்டிருந்தது. கொத்துக் குண்டுகள்,  மனித உரிமை மீறல்கள் மற்றும் முள்வேலி முகாம் என்று 2009ல் முள்ளிவாய்க்காலில் இலங்கை அரசு நடத்திய அனைத்து கொடூரங்களையும் சிற்ப ஆவணங்களாக வடிவமைக்கப் பட்டுள்ளது. இதன் பின்னால் முற்றத்தின் ஜோதியாக பாலச்சந்திரன் படுகொலையும் சார்லஸ் ஆண்டணியின் மரணமும் ஒரே சிற்பமாக இருவரின் உயிருடனான உருவமும் உயிரற்ற உடல்களும் ஆவணப்படுத்தப் பட்டுள்ளது.

பாலசந்திரன், சார்லஸ் ஆண்டனி சிற்பங்கள்

ஈகியர்கள் சிற்பங்கள்

இதைத் தவிர முள்ளிவாய்க்கால் அவலங்களை சித்தரித்த சிற்பங்களுக்கு நேரெதிராக முள்ளிவாய்க்கால் அவலம் நேர்ந்துவிடக் கூடாது என்று தங்கள் இன்னுயிரை ஈந்து போராடிய தோழர்களின் சிற்பங்களும், மாவீரன் முத்துகுமார் நடுநாயகமாக இருக்க முருகதாஸன் வரை அனைவரும் சிற்பங்களாக ஆவணப்படுத்தப்பட்டுள்ளனர்.  

மாவீரர்கள் மண்டபத்தில் சிவகுமரன், சங்கர் தொடங்கி அனைத்து மாவீரர்கள் படங்களும் வைக்கப்பட்டுள்ளது அவர்களின் சிறு வரலாற்று குறிப்புடன். இதை படிப்பவர்கள் அனைவருக்கும் ஈழப்போராட்ட வரலாறு முற்றிலுமாக தெரிந்து கொள்ளலாம். மேலும் உள் மண்டபத்தில் அனைத்து தமிழறிஞர்கள் படங்களும் தொகுக்கப்பட்டுள்ளது. பெயர் மட்டுமே தெரிந்த பல அறிஞர்களின் புகைப்படங்கள் இங்கு அனைவருக்கும் தெரிந்து கொள்ளும் வகையில் புகைப்படங்களாக காட்சிப்படுத்தப்பட்டுள்ளது.

முற்றத்தில் ஈழ வரலாறு பற்றி நிறைய சந்தேகங்கள் எழுப்பப்பட்டது என்னால் முடிந்த அளவிற்கு கேட்ட தோழர்களுக்கு விளக்கம் சொன்னேன்.. ஆனால் என்னால் ஒத்துக்கொள்ள முடியாத விசயம் மாணவத் தோழன் சிபி லெக்சுமணனிடம் வந்திருந்த ஒருவர் கேட்டிருக்கிறார். ”பாலச்சந்திரன் செத்துட்டானா?” என்று ஆம் இத்தனை வருடங்கள் கழித்து தமிழ்நாட்டில் பாலச்சந்திரன் கொல்லப்பட்டதை கூட அறியாதவராக ஒருவர் மட்டும் அல்ல இன்னும் பலர் உள்ளனர், இவர்களை தான் நாம் உருவாக்கி வைத்துள்ளோம். 2009க்கு பிறகு வந்த குபீர் உணர்வாளர்கள் என்று விமர்சிப்பவர்களும்,  திராவிட இயக்கம் என்று வியாக்கியானம் பேசி பலவருடங்களாக இயக்கம் நடத்துபவர்களும் தங்களின் திறமையை அனுபவத்தையும் வைத்து ஏன் பாலச்சந்திரன் மரணத்தை இந்த கடைசி குடிமகன் வரை கொண்டுசேர்க்க முடியவில்லை இத்தனை வருடமாக எப்படி மக்களை சென்றடைவது என்று யோசிப்பது இல்லை, தனக்கான அங்கீகாரத்தையும், தனக்கான மரியாதையையும் தான் எதிர் பார்க்கிறார்கள் இந்த பழம் திண்ணு கொட்டை போட்ட பழுத்த அரசியல்வியாதிகள்.

இந்த முற்றம் அமைய உதவியவர்கள் ம.நடராசனாகட்டும் அல்லது வேறு யாராக வேண்டுமென்றாலும் இருக்கட்டும் ஆனால் முற்றம் தஞ்சையின் நட்டநடுவே உலகிற்கு தன் கதையை சொல்ல தொடங்கிவிட்டது முற்றமும் அதை பார்க்க வரும் மக்களும் சொல்லட்டும் என்ன தேவை என்று… முற்றம் இனி எட்டு திக்கும் முரசறிவிக்கும் ஈழத் தமிழ் சொந்தங்களின் விடிவிற்கு வழி வகுக்கும்.

முற்றம் நெரிஞ்சி முள்ளாக ஆளவிரும்பும், ஆண்டுகொண்டிருக்கும் அனைத்து ஆதிக்கவாதிகளுக்கும் ஆப்பாக இருக்க போகிறது. 

குறிப்பு :- முற்றத்தின் திறப்பு நிகழ்விற்கு பாஜகவை அழைத்தது தேவையில்லாத ஒன்று தவிர்த்திருக்கலாம்.

பாராட்டப்பட வேண்டிய விசயம் பெரியார், காமராஜர் படங்களை வாஞ்சிநாதன் படம் வைத்த முற்றத்தில் வைக்காமல் விட்டதற்கு கோடான கோடி நன்றிகள். 

ஊதாரய்யா உதாரு நிலவரசு உதாரு...

நிலவரசு கண்ணன் இவர் நேற்றில் இருந்து விட்டுக்கொண்டு இருக்கும் உதாரு உங்கவூட்டு உதாரு எங்கவூட்டு உதாரு இல்ல, மாபெரும் உதார்கள். இவரை கொலை செய்ய போவதாக மிரட்டல் வருகிறதாம், அப்படி இப்படினு பல உதார்கள். இது வரை கேணை கிருக்கன் ஒருவனை பார்த்து வந்தோம் அதே அளவிற்கு அடுத்து ஒரு ஆள் உருவாகி இருக்கிறார். இவரை பற்றி அனைவரும் தெரிந்து கொள்ள வேண்டும் என்றே இந்த பதிவு. 

நமது போராட்டங்களின் நோக்கங்கள் அரசு பலவிதமாக திருப்பும், அதில் ஒன்று தான் இன்று ஊடகங்களில் வந்து கொண்டிருக்கும் செய்தியான 4 மத்திய அமைச்சரவை அமைச்சர்கள் பிரதமர் காமென்வெல்த் மாநாட்டுக்கு செல்வதற்கு எதிர்ப்பு தெரிவித்துள்ளனர் என்று வரும் செய்திகள். ஆனால் களத்தில் போராடி கொண்டிருப்பவர்களையும் திசை திருப்ப வேண்டும் போராட்டத்தின் நோக்கத்தை சிதைக்க வேண்டும் என்று ஊடகங்கள் மட்டும் அல்ல பல்வேறு உத்திகளை கொண்டு நிறைவேற்றும். இந்த நிலவரசு கண்ணன் அந்த அளவிற்கு ஒர்த் கிடையாது ஆனால் இவரால் முடிந்த அளவு இங்கு போராடிய ஒரு இயக்கத்தின் நோக்கத்தை சிதைத்து இருக்கிறார். 

திராவிடர் விடுதலை கழகம் காமென்வெல்த் மாநாட்டில் கலந்து கொள்ள கூடாது என்று போராடியதாக திரிக்கிறார். ஆனால் அவர்கள் 20-10-2013 அன்று சென்னைக்கு அருகில் உள்ள கூடுவாஞ்சேரியில் தொடர் முழக்க கண்டன ஆர்ப்பாட்டம் நடத்தியுள்ளனர். அதில் தெளிவாக தங்கள் கோரிக்கையை முன்னுறுத்தி இருக்கின்றனர். 

இந்த துண்டறிக்கையில் மிகத் தெளிவாக தங்கள் கோரிக்கையை அதுவும் முதன்மை கோரிக்கையை மிகவும் சரியாக இனப்படுகொலை நடந்த இலங்கையில் கமென்வெல்த் மாநாட்டை நடத்தாதே என்று தெளிவாக குறிப்பிட்டுள்ளனர்.  இது மட்டுமல்ல அவர்கள் நிகழ்வில் எடுத்த படத்தில் பின்னால் இருக்கும் பேனரிலும் அவர்கள் கோரிக்கையை தெளிவாக வலியுறுத்தியுள்ளனர். பேனரில் கோரிக்கை தான் மிக முக்கிய இடம் வகிக்கிறது அவர்கள் இயக்கத்தின் பெயர் கீழே ஒரு மூலையில் உள்ளது.

இப்படி அவர்கள் தங்கள் கோரிக்கையில் மிகவும் தெளிவாகவே இருக்கின்றனர். அவர்கள் இயக்கத்தின் பொதுச்செயலாளரும் இந்த நிகழ்வில் கலந்து கொண்டு தங்களின் கோரிக்கையை தெளிவாக எடுத்துச் சொல்லி இருக்கிறார்கள். ஆனால் இப்படி அவர்கள் கோரிக்கையில் தெளிவாக இருக்கும் பொழுது. நிலவரசு கண்ணன் திராவிடர் விடுதலை இயக்கம் கோரிக்கையை திரிக்கிறது போராட்டத்தை திசை திருப்புகிறது என்று ஒப்பாரி வைக்கிறார். அதாவது அவர்கள் செய்யாத ஒன்றை அதுவும் முழுப் பொய்யை திரும்ப திரும்ப வாயிலும் வயிற்றிலும் அடித்துக் கொண்டு ஒப்பாரி வைத்து தான் சொல்லும் பொய்யை உண்மை என்று நம்ப வைக்க முயற்சிக்கிறார். 

திராவிடர் விடுதலை கழகம் தாங்கள் நடத்திய போராட்டத்தில் மட்டுமில்லை மே 17 இயக்கம் இங்கிலாந்து, இந்திய அலுவலகங்களை முற்றுகையிட்ட போராட்டத்திலும் கலந்து கொண்டனர். இந்த போராட்டமும் காமென்வெல்த் மாநாட்டை இலங்கையில் நடத்தக்கூடாது என்று வலியுறுத்தி நடத்தப்பட்டது தான். இப்படி எந்த போராட்டத்திலும் தங்கள் கோரிக்கையை மாற்றிக் கொள்ளாத திராவிடர் விடுதலை கழகம் போராட்ட நோக்கத்தை திசை மாற்றுகிறது வடுகர்கள் அது இது என்று ஒரு படத்தை தரவேற்றுகிறார். அந்த படம் 

இதில் இடது புறம் இருப்பது தந்தை பெரியார் திராவிடர் கழகம் நடத்திய இரயில் மறியல் இரண்டாவதாக வலது புறம் இருப்பது திராவிடர் விடுதலை கழக தோழர்கள் மத்திய அரசு அலுவலகங்களை எந்த உயிர்சேதமோ, காயமோ யாருக்கும் ஏற்படாவண்ணம் தாக்கிய பிறகு அவர்கள் காவல் துறையினர் மத்திய புழல் சிறைக்கு அழைத்து செல்லும் முன்பாக எடுக்கப்பட்ட படம். இந்த படத்தை திராவிரடர் விடுதலை கழக நண்பர்கள் முகநூலில் நவம்பர் ஒன்றாம் தேதியே பதிவேற்றி இருக்கின்றனர்ர் அங்கிருந்து தான் இவரும் எடுத்திருப்பார். அதில் மிகவும் தெளிவாக போராட்டம் எதற்கு என்று குறிப்பிட்டுள்ளனர். 

இப்படி நவம்பர் ஒன்றாம் தேதி தரவேற்றப்பட்ட படத்தை எடுக்கும் பொழுது படத்தின் மேல் சொல்லப் பட்ட செய்தியை படிக்கவில்லையா இவர் என்று தெரியவில்லை. ”சென்னை மயிலாப்பூர், மந்தைவெளி தபால் நிலையங்களில் இலங்கையில் காமென்வெல்த் மாநாடு நடக்கக் கூடாது என்று எதிர்வினையாற்றினார்கள் என்பதால் கைது செய்யப்பட்ட திராவிட விடுதலை கழகத்தின் தோழர்களின் மீது தேசிய பாதுகாப்புச் சட்டம் பாய்ந்துள்ளது” என்று தெளிவாக குறிப்பிட்டுள்ளனர். ஆனால் இவர் போராட்டத்தை திராவிட இயக்கமான இவர்கள் திசை திருப்புவதாகவும் அவர்கள் பெயர் எடுக்க முயல்வதாகவும் ஓவென்று கூக்குரலிட்டு அழுகிறார். நேற்று இரவு வரை முதல் இன்று முழுவதும் இவர்களை அம்பலப்படுத்திவிட்டேன் என்று அடை மொழி வேறு, இவர் இப்படி அம்பலப்படுத்தியதால் கொலை மிரட்டல் வருவதாக செய்தி தொடர்ந்து பதிந்து வருகிறார். இப்பொழுது கூட தன் நிலைத்தகவலில் பதிந்துள்ளார். 

https://www.facebook.com/nilavarasu/posts/561431063909944

இதில் இவர் திராவிடர் விடுதலை கழகத்தினர் மத்திய அரசு அலுவலகத்திற்கு எதிரான போராட்டத்தை கொச்சைப் படுத்தவும் முயன்றார், போராட்டத்தை மட்டுமல்ல போராட்டத்தில் பங்கெடுத்த போராளிகளையும் அசிங்கப்படுத்தினார். அதையும் இங்கு பலர் பகிர்ந்துள்ளீர்கள் இது மாபெரும் வெட்க கேடு. திராவிடர் விடுதலை கழக தோழர்களுடன் இந்த போராட்ட களத்திற்கு வந்தது முதல் பழகி வருகிறேன், அவர்கள் ஆட்டு மந்தை கூட்டமல்ல தலைமை சொல்வதை கேட்பது மட்டும் தங்கள் வேலை என்று செய்ய. தலைமையின் கருத்து தங்களுக்கு பிடிக்காவிடில் நேரடியாகவே விவாதிப்பார்கள், அதே போல் தாங்கள் முன்னெடுக்க விரும்பும் போராட்டங்களை தலைமையின் அனுமதிக்காக காத்திருந்து செய்பவர்கள் இல்லை தங்கள் மனதிற்கு சரி எனப்பட்டதை செய்யும் போராளிகள். அங்கிருக்கும் தோழர்கள் தங்களுடைய வாழ்க்கையையும் சரியாக வழி நடத்திக்கொள்வார்கள். அவர்கள் போராடுவதற்காக வந்தவர்கள் இல்லை வாழ்க்கையை போராட்டமாக அமைத்துக் கொண்டவர்கள். தலைமையில் இருந்து கடைசி தொண்டர் வரை சொல்வார்கள் “தமிழ்நாடு தமிழருக்கே” என்று.. 

நிலவரசு கண்ணன் முதலில் எந்த இயக்கத்திலும் இல்லாமல் இருந்தார் பின்னால் நாம் தமிழர் கட்சியில் இணைந்தார் இவருக்கு ஊடக பொறுப்பு கொடுக்கப்பட்டுள்ளது என்று முகநூலில் பதிந்திருந்தார் அவர்கள் கொடுத்தார்களா என்பது எனக்கு தெரியாது. ஆனால் அதன் பிறகு அங்கிருந்து நீக்கப்பட்டார் என்று தகவல் வந்தது. இப்பொழுது எந்த அமைப்பிலும் இல்லை ஆனால் தன்னை தமிழ் தேசியவாதி, தமிழ் உணர்வாளர் என்று கூறிக்கொள்கிறார். ஆனால் இவர் யார் என்பது யாருக்கும் தெரியவில்லை, சிறிது காலம் தலித்தியமும் பேசினார். நானும் இவரும் பல விவாதங்களில் ஆதிக்க சாதி வெறிக்கு எதிராக விவாதித்து இருக்கிறோம். ஆனால் இங்கு ஒரு இயக்கத்தின் ஒட்டுமொத்த கொள்கையும் அதன் போராட்ட நோக்கத்தையும் திசை திருப்பும் இவரைப் போன்ற புல்லுறுவிகள் நமக்கு தேவையா என்று சிந்திக்க வேண்டும். 

இவர்களைப் போன்றவர்கள் பேசுவதை உண்மை என்று எண்ணிக் கொண்டு உண்மையிலேயே திராவிடர் விடுதலை கழகத்தின் போராட்ட நோக்கம் என்ன என்பதை தெரியாமல், விசாரித்து தெரிந்து கொள்ளாமல் இருப்பதனால் ஏற்படும் அநாகரீக தகவல்களை மற்றவர்களுக்கும் பகிர்வதை செய்து வருகிறோம். இனிமேலாவது இவரை போன்றவர்கள் மட்டுமல்ல நான் பதிவு செய்தால் கூட என்ன ஏது என்பதை ஆதாரம் இல்லாமல் பதிந்தால் ஏற்றுக் கொள்ளாதீர்கள். இங்கு நான் அனைத்து ஆதாரங்களையும் தேதி வாரியாக பதிவு செய்துள்ளேன். எதாவது சந்தேகம் இருந்தால் கேட்கவும் தகவல்களை தர தயாராக உள்ளேன்.. 

கொளத்தூர் மணி தோழர்

கொளத்தூர் மணி தோழரை முழுதாக அறிந்தவன் இல்லை, அவர் செய்த சில விசயங்கள் மட்டும் தான் எனக்கு தெரியும். காரணம் அவர் என்றும் தான் இதை செய்தேன் அதை செய்தேன் என்று எங்கும் தன்னை விளம்பரப் படுத்திக் கொண்டதில்லை. 

ஈழ விடுதலைப் போராட்டமும் அதில் தோழர் கொளத்தூர் மணி அவர்களின் பங்கும் அனைவரும் ஒரளவு அறிந்ததே. பொன்னம்மான் பயிற்சியின் தலைவராக இருந்து கொளத்தூரில் நடந்த முகாமை பற்றியும் இன்றும் அந்த ஊர் மக்கள் பொன்னமானுக்கும் புலிகள் அமைப்பிற்கும் அளித்து வரும் மரியாதையும். ஆம் புலியூர் என்று பெயரை தாங்கி ஒவ்வொரு வருடமும் நவம்பர் 27ம் தேதி மாவீரர் நாளை தொடர்ந்து நடத்தி வருபவர்கள் அவர்கள் என்பது நாம் அறிந்ததே. இப்படி தன் இடத்தை கொடுத்து பயிற்சி முகாம் நடத்திக் கொள்ள அனுமதி அளித்தவர் தான் கொளத்தூர் மணி தோழர். இதை விட அதிகமாக என்னால் எதுவும் சொல்ல இயலாது இதற்கு மேல் சொல்ல வேண்டியது இயக்கம் தான், இயக்கமே இவரை அங்கீகரித்து இவரைப் பற்றி வெளியில் சொல்ல வேண்டும் அது தான் சரியான ஒரு மரியாதையாக இருக்கும். 

வீரப்பன் பிரச்சனையில் நக்கீரன் கோபால் பேச்சு வார்த்தை நடத்த சென்ற பொழுது இவரையும் அழைத்து சென்றார்கள். அது மட்டுமே ஊடக வாயிலாக இவரைப் பற்றி நாம் தெரிந்து கொண்ட ஒரே நடவடிக்கை. ஆனால் அப்பொழுது வீரப்பனை பிடிக்க நியமிக்கப்பட்ட அதிரடிப் படையினரால பாதிக்கப்பட்ட மக்களுக்கு இவர் செய்த உதவிகள் எண்ணிலடங்காதவை, எவையும் ஊடகங்களால் நமக்கு கொண்டு வந்து சேர்க்கப்பட்டதில்லை. 

அரசு இயந்திரத்தினால் மனித உரிமை மீறல்கள் நடக்கும் பொழுது அதற்கு எதிர்த்து குரல் கொடுத்து வெற்றி பெறுவது என்பது மிகவும் சொற்பமாகவே நடக்கும். அதுவும் அதிரடைப்படையின் அட்டகாசங்களுக்கு எதிராக போராடி வெல்வது என்பது மிகப்பெரிய சாதனை, அப்படி 1983 ஜூன் மாதம் கொளத்தூர் பகுதியில் இருந்து விரப்பனின் கூட்டாளிகள் என்று பதினோரு பேர்கள் காவல்துறையினரால் கடத்த்ப்பட்டனர். காவல் துறை கைது செய்திருந்தால் அவர்கள் எங்கிருக்கிறார்கள் என்பது நமக்கு தெரியும் ஆனால் காவல் துறையினரால் கைது என்று சொல்லி அழைத்து செல்லப்பட்டவர்கள் எங்கே என்று தெரியாத அளவிற்கு எந்த சட்ட நடைமுறையும் பின்பற்ற படவில்லை எனில் அதை காவல்துறையினர் நடத்திய கடத்தலாகவே நாம் பார்க்க முடியும். அப்பொழுது சென்னை உச்சநீதிமன்றத்தில் ஆட்கொணர்வு மனு (ஹேபியஸ் கார்பஸ்) தாக்கல் செய்து, கடத்தப்பட்ட 11 பேரில் 9 பேரை உயிருடன் மீட்க காரணமாக இருந்தவர் தோழர் கொளத்தூர் மணி அவர்கள் தான். இது தான் அதிரடிப்படையின் மனித உரிமை மீறலுக்கு எதிராக போராடி வெற்றி பெற்ற முதல் போராட்டம் ஆகும். 

இதைப் போல் தொடர்ந்து அதிரடிப்படையின் அனைத்து மனித உரிமை மீறல்களையும் வெளிக்கொணரும் அனைத்து களத்திலும் தோழர் கொளத்தூர் மணி அவர்கள் முன்னின்று போராடியுள்ளார். தேசிய மனித உரிமை ஆணையத்தால் சதாசிவம் கமிசன் அமைக்கவும் காரணமானவர் தோழர் கொளத்தூர் மணி அவர்கள் தான். தமிழக கர்நாட கூட்டு அதிரடிப்படையின் மனித உரிமை மீறல்கள், வன்புணர்ச்சிகள், சித்திரவதைகள், படுகொலைகள் என்று பல மறைக்கப்பட்ட உண்மைகளை வெளிக்கொணர தமிழ்நாடு பழங்குடியினர் சங்கம், தமிழ்நாடு சிவில் உரிமை கழகம், கர்நாடக மக்கள் சிவில் உரிமை கழகம், சோகோ அறக்கட்டளை, மக்கள் கண்காணிப்பகம் மற்றும் தோழர் கொளத்தூர் மணி இணைந்து முதன் முதலாக அதிரடைப்படையினரால் பாதிக்கப்பட்டோர் மாநாட்டை 27.4.1998 அன்று நடத்தினர். இதை தொடங்கி வைத்தவர் தமிழக மனித உரிமை கழகத்தின் அன்றைய உறுப்பினர் இரத்தினசாமி. 

இதன் பிறகே தேசிய மனித உரிமை ஆணையம் கர்நாடக உயர்நீதி மன்றத்தில் பணியாற்றி ஒய்வுபெற்ற நீதிபதி சதாசிவா தலைமையில் விசாரணை கமிசன் ஆரம்பித்தது. இந்த கமிசனின் அறிக்கை சமர்பிக்கப்பட்டு இது வரை அதன் மீதான நடவடிக்கை எடுக்கப்படவில்லை, தொடர்ந்து இதற்கான முன்னெடுப்புகளை நடத்தி வருபவர் தோழர் கொளத்தூர் மணி அவர்கள். இன்று கர்நாடக சிறையில் தூக்கு கயிற்றின் நிழலில் வாடிக் கொண்டிருக்கும் சைமன், பிலவேந்திரன், ஞானசேகரன், மற்றும் மாதையன் அவர்களின் தூக்கு கயிற்றை அறுத்து எரியும் போராட்டத்தில், இங்கு எப்படி மூவர் உயிர் காக்கும் போராட்டத்தில் முன்னின்று போராடிக் கொண்டிருக்கிறாரோ அதே போல் கார்நாடகத்தில் இருக்கும் தமிழர் நால்வர் உயிர்காக்கவும் தன்னால் இயன்ற அனைத்து பணிகளையும் செய்து கொண்டிருப்பவர் தான் தோழர் கொளத்தூர் மணி. 

எனக்கு தெரிந்து இவர் செய்த பணியை பட்டியலிட்டிருக்கிறேன், இதை தவிர அவர் அணு உலைக்கு எதிரான போராட்டங்கள் ஒருங்கிணைப்பது, மூவர் விடுதலை போராட்டங்களில் ஒருங்கிணைப்பது என்று அனைத்து தலைவர்களையும் எந்த பேதமும் இன்றி ஒரிடத்தில் ஒருங்கிணைக்கும் பணியை தொடர்ந்து செய்து வருபவர். அனைவரையும் ஓரணியில் திரட்டி போராட தொடர்ந்து முயன்று வருபவர் தொடர்ந்து போரடி வருபவர். 

மாற்று அரசியலும் மாற்ற கிளம்பிய மன்னார்களும் பகுதி - 4

அரசியல் விவாதங்கள் அதற்கான ஆரோக்கியமான போக்கு என்பது வைக்கும் கருத்துகளுக்கு எதிரான தங்களுடைய அரசியல் நிலைப்பாட்டு விளக்கங்களே ஆனால் இப்பொழுது நடந்து வரும் விவாதத்தில் வைக்கப்பட்ட கேள்விகள் புறந்தள்ளப்பட்டு இத்தனை நாள் கேட்க வேண்டிய கேள்விகளை கேட்காமல் இருந்துவிட்டு இன்று வந்து உங்கள் கொள்கை என்ன என்று இப்பொழுது கேள்வி கேட்டுக் கொண்டு இருக்கிறார்கள் ஒரு புறம். மறு புறம் தோழரின் உயிர் முக்கியம் அதனாலேயே சமரசம் செய்து கொண்டோம் 9 கோரிக்கைகளும் நிறைவேற்ற முடியாதவை அதில் ஒரளவாது ஒன்றில் முன்னேற்றம் ஏற்பட்டுள்ளது அதனாலேயே என்று வியாக்கியானங்களும் முன் வருகின்றன. இப்படி எந்த விதமான அரசியல் தெளிவுமே இல்லாமல் வைக்கப்படும் கருத்துகளுடன் தான் இந்திய அரசுக்கு எதிரான போராட்டம் கோரிக்கையை நாம் இந்தியாவிற்கு வைத்து அதற்கு தான் நெருக்கடி கொடுக்க வேண்டும் என்கிறார்கள்.

இங்கு கேட்கப்படும் கேள்விகள் புரிந்தாலும் அதை குறித்த பதிலை அளிப்பதை விட கிச்சு கிச்சு தாம்பாளம் விளையாடுவதே அரசியல் என்ற நிலையில் இருக்கிறார்கள் சிலர், அவர்களுக்காக திரும்பவும் அதே கேள்விகள். தோழர் தியாகுவின் போராட்டத்தின் முதல் கோரிக்கை கமென்வெல்த் மாநாடு இலங்கையில் நடக்க கூடாது, அவ்வாறு நடத்துவதை தடுத்து நிறுத்த முடியாவிடில் இந்தியா கலந்து கொள்ள கூடாது, அல்லது இந்தியாவின் தலைமை அமைச்சர் கலந்து கொள்ள கூடாது என்பதே. இதில் கோரிக்கையை முதல்நாள் ஆரம்பித்த அன்றிலிருந்து பேச வேண்டியது கமென்வெல்த் மாநாட்டை நடத்தாதே என்பது தான், இந்திய பிரதமரிடம் இருந்து வந்த கடிதம் இதில் எதையும் உறுதி செய்யவில்லை தமிழர்களின் நலன் கருதி முடிவு செய்வோம் என்று தான் இருந்தது. இது தான் போராட்டம் தொடங்கி முடிந்த வரை நடந்த ஒட்டுமொத்த நிகழ்வு. இதில் யாரும் எந்த குறையும் சொல்லவில்லை ஆனால் இங்கு ஒட்டுமொத்தமாக நிகழ்வு இலங்கையில் மாநாடு நடத்தக் கூடாது என்ற கருத்திற்கு எதிராக செல்ல அனுமதித்தது ஏன் என்பது தான் கேள்வி.

உண்ணாவிரதம் நடந்த பொழுது பல்வேறு போராட்டங்கள் தோழமை இயக்கங்களாலும் எடுக்கப்பட்டது கூட்டமைப்பில் இருக்கும் இயக்கங்களாலும் எடுக்கப்பட்டது அதை ஊடகங்கள் தங்கள் தேவைக்கு திரித்தது எல்லாம் எப்பொழுதும் நடக்க கூடியது. ஆனால் தங்களின் சொந்த இணைய தளங்களில் கூட முதல் கோரிக்கையான கமென்வெல்த் மாநாடு நடக்க கூடாது என்பதற்காக நடத்தப்பட்ட போராட்டம் என்பதை பதியாமல் மாற்றி இந்தியா கலந்துக்க கூடாது என்பதை பதிந்தது ஏன்..

கடைசியாக சென்ற சனிக்கிழமை மாணவர்கள் மெரினாவில் நடத்திய போராட்டத்தில் கூட ஊடக திரிப்பு என்பது அரசுக்கு சாதகமாகவே இருந்தது அதாவது போராட்டம் நடத்தப்பட்டது கமென்வெல்த் மாநாடு இலங்கையில் நடக்க கூடாது என்பதை வலியுறுத்தி அங்கு பேட்டியளித்த மாணவ மாணவிகளும் தெளிவாக சொன்னார்கள். ஆனால் செய்தி ஒளிபரப்ப பட்டது இந்தியா கலந்து கொள்ள கூடாது என்பதை வலியுறுத்தி என்று சொன்னார்கள்.

புதியதலைமுறை செய்தி - கடந்த சனிக்கிழமை Walkathon  

NewsX News. about Wlakathon

அப்படி ஊடகங்கள் திரித்த செய்திகளை வெளியிட்டு வருகிறது, தினத்தந்தியோ, தினமலமோ, தி இந்துவோ செய்தியை தனது நோக்கத்துடனே, அரசுக்கு ஜால்ரா அடித்து தான் வெளியிடும் அதைப் பற்றி கவலையில்லை சமூக ஊடகமான முகநூல் பக்கத்தில் நீங்கள் போராட்டத்தின் நோக்கமாக பதியும் பொழுது இலங்கையில் கமென்வெல்த் மாநாடு நடக்க கூடாது என்று பதிந்து இருக்கலாமே அங்கேயும் நீங்கள் அதை செய்வதில்லை.

இந்த பதிவு உங்களின் சொந்த மாணவர் போராட்ட குழு சென்னையில் நடத்திய இரயில் மறியலைபற்றி உங்கள் பக்கத்தில் தகவலாக பதியும் பொழுது இப்படியா பதிவீர்கள். இந்தியா கலந்து கொள்ள கூடாது என்று மட்டும் இந்த போராட்டம் நடந்தது உண்ணாவிரதம் ஆரம்பித்து 11ம் நாள் அன்றே போராட்டத்தின் நோக்கமாக நீங்கள் கூறுவது இந்தியா கலந்து கொள்ள கூடாது என்பது தான்.

இன்னும் இருக்கு போராட்டத்தின் 14ம் நாள் கோயம்பேட்டில் போராட்ட குழு மாணவர்கள் தாக்கப்பட்ட செய்தி எந்த ஊடகத்திலும் வந்ததாக தெரியவில்லை ஆனால் முகநூலில் பகிர்ந்தீர்கள் பலருக்கும் போய் சேர்ந்தது ஆனால் அதில் திரும்பவும் இந்தியா கலந்து கொள்ள கூடாது என்ற வாசகங்களே இடம் பெற்றுள்ளது. நமது மாற்று ஊடகமான முகநூலில் கூட காமென்வெல்த் மாநாடு நடக்க கூடாது என்பதை வலியுறுத்தும் அளவிற்கு இல்லாமல் போனது ஏனோ? இது இந்த நிகழ்வு மட்டுமல்ல அனைத்து நிகழ்விலும் தொடர்ந்து தங்களுடையை பதிவுகள் இப்படித் தான் இருக்கிறது.

உண்ணாவிரத செய்தியை ஊடகங்கள் இருட்டடிப்பு செய்யும் பொழுது நாம் நம்புவது மாற்று ஊடகங்களையும், சுவரொட்டிகளும் தான். நமது செயல்பாடுகளை மக்களுக்கு கொண்டு சேர்க்க வேண்டும் என்பதில் வேறு வழி நமக்கு இல்லை. ஆனால் அந்த சுவரொட்டிகளில் ஆரம்பம் முதல் எங்கும் “காமென்வெல்த் மாநாட்டை நடத்தாதே” என்று பதிவு இல்லை, இனப்படுகொலை இலங்கையில் காமென்வெல்த் மாநாடா?!!?? என்று பதிந்து கேள்விக் குறியோ ஆச்சரிய குறியோ மட்டும் தான் இருக்கிறது. அதற்கடுத்து இந்தியாவை மறிப்போம் இது தான் அரசியல் தகவலாக மற்றோர் மாற்று ஊடகத்தில் தாங்கள் கொடுக்கும் செய்தியா??

இப்படி ஆரம்பத்தில் இருந்தே போராட்டத்தின் மைய நோக்கத்தை சிதைக்கும் விதமாக பதிவுகளும் சுவரொட்டிகளும் நாங்கள் பதிவிடவில்லை ஆனால் தங்களின் பதிவுகள் தான் சொல்கிறது. உண்ணாவிரத போராட்டம் எத்தனையாவது நாள் என்று அறிவிக்கும் சுவரொட்டியில் எதற்கு நடக்கிறது என்று கேட்டால் இந்தியாவை மறிப்போம் என்பது மட்டும் தான் இருக்கிறது எதற்காக மறிப்போம் ஏன் மறிப்போம் என்ற கேள்விகளுக்கு எல்லாம் நான் கற்பனை செய்து கொள்ளலாம் பாமர மக்கள் தினமும் தன் வாழ்க்கையை நகர்த்த போராடும் மக்கள் அறிந்து கொள்ள வாய்ப்பில்லை என்பதை அருகில் இருக்கும் தமிழர் தன்மான பேரவை சுவரொட்டியில் தெளிவாக அதுவும் போராட்டத்திற்கு ஆதரவு தெரிவித்த சுவரொட்டியில் குறிப்பிட்டு இருக்கிறார்கள்.

இப்படி போராட்டத்தின் நோக்கதை சிதைக்கும் விதமாகவே பதிந்து போராட்டம் முடிக்கும் பொழுது இந்தியா பங்கேற்க கூடாது என்று இந்திய ஆளும் அரச வர்கத்தின் சிந்தனையை பிரதிபலிக்கும் கருணாநிதியின் கோரிக்கையின் கீழ் முடிக்கப் படும்பொழுது இத்தனை நாள் தோள் கொடுத்து நின்ற தோழர்களுக்கு எப்படி இருந்து இருக்கும். இத்தனை நாள் போராட்டங்கள் பல நாம் செய்திருந்தாலும் அதன் நோக்கம் மக்களை சென்றடைந்ததா என்று கேட்டால் இல்லை என்பதை தெளிவாக சொல்ல முடியும். எனென்றால் இங்கு மக்களுக்கான அரசியல் என்பது கருணாநிதியின் குரலும் ஜெயலலிதாவின் குரலும் பிரதிபலிப்பது தான் என்ற நிலையில் இருக்கிறோம். இவர்கள் இருவருமே என்றும் ஈழவிடுதலைக்கு ஆதரவானவர்களாக முழுமையாக தங்களை காட்டிக் கொண்டவர்கள் இல்லை.

தமிழக மக்களிடையே நடக்கும் அரசியல் மாற்றங்களுக்காக அவ்வப்பொழுது வேடமிடும் வேடதாரிகள், தமிழக மக்களிடம் ஈழப் படுகொலையை கொண்டு சேர்த்து இந்த வேடதாரிகளுக்கு எதிராக அவர்களின் மனதை மாற்றிய பெரும் பங்கு மாற்று அரசியலை உருவாக்க ஓடிவந்த கூட்டத்தையே சாரும். ஆனால் இங்கு இந்த போராட்டத்தை பொறுத்தவரை அனைத்துமே தவறாகவே சித்தரிக்கப்பட்டு வந்திருக்கிறது என்பதை தெளிவாக இங்கிருக்கும் பதிவுகளால் உணர்ந்து கொள்ளலாம். 

போராட்டம் தோழமை அமைப்புகளின் கோரிக்கையினாலும், பிரதமரின் கடிதத்தாலும் தான் உண்ணாவிரதம் முடிக்கப்பட்டது தோழர் தியாகுவின் உயிர் காப்பாற்றப்பட்டது என்பதில் மகிழ்ச்சியே. ஆனால் இதை கடந்த ஞாயிற்றுக் கிழமை அத்தனை தோழமை இயக்கங்களும், தலைவர்களும் வந்த பொழுதே அறிவித்திருந்தால் இன்று கோரிக்கை சிதைக்கப்பட்டு இந்தியா பங்கேற்க கூடாது என்ற நிலையில் இருக்கும் நிலையை அடைந்திருக்காது.. இன்று கருணாநிதி மற்றுமொரு இயேசுவாக உருவாகி தோழர் தியாகுவின் உயிரை காப்பாற்றி கொடுத்திருக்கிறார். வாழ்க மாற்று அரசியல் வாழ்க.. கொண்டு செல்லட்டும் இந்த அரசியல் தமிழின மீட்சியின் பாதையில்... 

மாற்று அரசியலும் மாற்ற கிளம்பிய மன்னார்களும் - பகுதி 3

ஆரம்பக் கட்டுரையிலேயே சொன்னேன் எளியவர்கள் எடுக்கும் ஒரு போராட்டம் அதன் குரல் எப்படி வலியவர்களால் சிதைக்கப்படும் என்று அது இன்று முற்றும் முழுவதும் ஜெயலலிதாவின் கடிதம் மூலமாக பாமர மக்களுக்கு சென்றடைந்து இருக்கிறது. ஆம் தியாகு தோழர் முதன் முதலில் உண்ணாவிரதம் என்று அறிவித்ததை நான் செங்கொடி நினைவு தினம் அன்று காஞ்சிபுரத்தில் வைத்து அறிந்துகொண்டேன் துண்டறிக்கை வாயிலாக. அப்பொழுது கோரிக்கைகளை படிக்கவே இல்லை தியாகு தோழரும் நிகழ்வுக்கு வந்திருந்தார் உடனடியாக சென்று எனது எதிர்ப்பை பதிவு செய்தேன். வேறு ஒன்றும் இல்லை இங்கிருக்கும் அரசியல் சக்திகளை நம்பி இந்த போராட்டத்தில் இறங்காதீர்கள் உங்களை சாகடித்துவிட்டு தான் மறு வேலை பார்ப்பார்கள் வேண்டாம் என்றேன். அவர் அலுவலகம் வாருங்கள் பேசலாம் என்றார் ஆனால் அப்பொழுதே சொன்னேன் உங்களின் வேலை வருங்கால சந்ததிகளை வழிநடத்துவது, சர்வதேச நகர்வுகளை கணித்து எங்களுக்கு உணர்த்துவது, இத்தகைய உண்ணாவிரத செயல்பாடுகள் இல்லை என்று சொல்லி என் எதிர்ப்பை பதிவு செய்து முடித்தேன்.

பிறகு என் அறைக்கு வந்த பிறகு தான் கோரிக்கைகளை படித்தேன் அதில் முதலாவதான கோரிக்கை காமென்வெல்த் மாநாடு இலங்கையில் நடைபெறக் கூடாது என்பது, மிகவும் அரசியல் பூர்வமான கோரிக்கை இப்பொழுது இந்த மாநாட்டை அனுமதித்தால் அடுத்து ராஜபக்சே உலக அரங்கில் மிகப்பெரும் தலைவராக மதிக்கப்படுவார். காமென்வெல்த் கூட்டமைப்பின் அடுத்த இரண்டு ஆண்டுகள் இவர் தான் தலைவராக இருப்பார் இது இனப்படுகொலை நடத்திய இவரை உலக அரங்கின் முன்பு நாம் குற்றவாளியாக நிறுத்த எடுத்துவரும் நடவடிக்கைகளுக்கு ஒரு தடைக் கல்லாக அமையும் என்பதால் வைக்கப்பட்ட கோரிக்கை ஆனால் இன்று அந்த கோரிக்கை முழுவதுமாக சிதைந்துவிட்டது. இதற்கு காரணம் தோழர் தியாகுவும் தான்.

கடந்த ஆக்ஸ்ட் மாதம் 18ம் தேதியே கருணாநிதி காமென் வெல்த் மாநாட்டில் இந்தியா கலந்து கொள்ள கூடாது என்றார், எப்பொழுதும் இவருக்கு எதிராக பேசுவதை தமிழக மக்களுக்கு செய்யும் சேவையாக கருதும் ஜெயலலிதாவும் இன்று காமென்வெல்த் மாநாட்டில் இந்தியா கலந்து கொள்ள கூடாது என்கிறார். ஆகமொத்தம் இந்தியாவின் ஆசையை இவர்கள் இருவரும் பிரதிபலிக்கிறார்கள் ஒருமித்த குரலில். இதில் எளியவர்களாகிய நமது போராட்டம் காமென்வெல்த் மாநாட்டை இலங்கையில் நடத்தி இலங்கைக்கு அங்கிகாரம் கொடுக்காதே என்ற குரல் இப்பொழுது மங்கி மறைந்துவிட்டது. இதை கருணாநிதியும் ஜெயலலிதாவின் உரத்த குரல்கள் அதுவும் பாமரனுக்கு தெரிந்த குரல்களால் மட்டும் மங்கவில்லை. தியாகுவின் போராட்டத்தை பாதுகாத்து வழிநடத்திய கூட்டமைப்பும் சேர்ந்தே இருட்டடிப்பு செய்துள்ளன. இந்த கூட்டமைப்பின் முக்கிய அங்கத்தினர் தமிழ்நாடு மக்கள் கட்சியினர் இந்த அமைப்பில் இருந்து அருண் சோரி தான் அனைத்து வேலைகளையும் முன்னின்று செய்பவர், கட்சியின் செய்தி தொடர்பாளர். இவருக்கு ஒரு வார்த்தையை மாற்றி கூறினால் தவறான பொருள் படும் என்பது புரியாமல் போனது தான் அதிசயமாக உங்களுக்கு இருக்கும் ஆனால் கடந்த பல வருடங்களாக இவரை பார்த்து வரும் எனக்கு அதிசயமாக தெரியவில்லை.

இந்த பதிவில் தோழர் தியாகு போராட்டத்தை முடித்துக் கொண்டது இந்தியா காமென்வெல்த் மாநாட்டில் பங்கு கொள்ள கூடாது என்ற நோக்கத்துடன் மட்டுமே என்று அவரின் உண்ணாவிரதம் நிறுத்தப்பட்டத்தை அறிவிக்கும் பொழுது அறிக்கையாக சமர்ப்பிக்கின்றனர். 

சரி இவர்களின் மாணவர் அமைப்பான தமிழ்நாடு மாணவர் இயக்கமும், தமிழீழத்திற்கான மாணவர் போராட்ட குழுவும் சரி நடத்திய போராட்டங்களில் காமென்வெல்த் மாநாட்டில் இந்தியா பங்கேற்க கூடாது என்ற கோரிக்கை தான் முன்னிறுத்தப் பட்டுள்ளதை நாம் தெளிவாக இங்கு இருக்கும் தரவுகளில் தெரிந்து கொள்ளலாம். தோழர் தியாகுவின் காமென் வெல்த் மாநாடு நடக்க கூடாது அப்படி மாநாடு நடந்தால் இந்தியா பிரதமர் பங்கு ஏற்க கூடாது என்று ஒரு தேர்வாக தான் கோரிக்கை வைத்தார். ஆனால் முதன்மை கோரிக்கையை விடுத்து தேர்வாக (Choice) வைத்த கோரிக்கையை தான் தமிழ்நாடு மக்கள் கட்சி முன்னிறுத்தி போராடி வருகிறது, கருணாநிதியும் ஜெயலலிதாவும் இதே கோரிக்கையை தான் சொல்கிறார்கள்.

இந்திய பிரதமரின் கடிதமும் கலந்து கொள்வதை பற்றி ஆலோசனை செய்வோம் என்கிறதே ஒழிய, காமென்வெல்த் மாநாட்டை இனப்படுகொலை செய்த இலங்கையில் நடத்தாமல் இருப்பதற்கு ஆலோசனை செய்வோம் என்று சொல்லவில்லை. தமிழ்நாடு மக்கள் கட்சி இப்படி கோரிக்கைகளை திசை திருப்புவதும் போராட்டங்களை திசை திருப்புவதையும் தொடர்ந்து செய்து வருகிறது. இதற்கு தடையாக யாராவது இருப்பார்கள் என்றால் அவர்களை ஓரங்கட்டும் பணியை தெளிவாக செய்யும். அருண் சோரி இன்று தான் தமிழ்நாடு மக்கள் கட்சி எனும் பெயரில் இயங்குகிறார் இதற்கு முன்பாக தமிழர் இளைஞர் எழுச்சி பாசறையாக செயல் பட்ட பொழுது அணு உலைக்கு எதிரான கூட்டமைப்பு உருவாக்கப் பட்டது அதில் மே 17 திருமுருகனுக்கும், திருநெல்வேலி மே 17 இயக்க ஒருங்கிணைப்பாளருக்கும் பொறுப்புகள் முதலில் வழங்கப்பட்டது ஆனால் அது யாரை கேட்டார்கள் இல்லை பொறுப்புகளை அறிவித்த பிறகு எப்படி மாற்றினார்கள் என்பது யாருக்குமே தெரியாது அடுத்து வந்த அறிக்கைகளில் இவர்கள் பெயர் மாயம் ஆனது.

கூட்டமைப்பு என்று ஒன்றை ஏற்படுத்தி அதில் தங்களுக்கு பிரச்சனை கொடுப்பவர்களை அதாவது கூட்டமைப்பு எதற்காக ஏற்படுத்தப் பட்டதோ அந்த நோக்கத்தை விட்டு விலகும் பொழுது பிரச்சனை கொடுப்பவர்களை ஒதுக்கி வைப்பது இந்த அருண்சோரிக்கு கைவந்த கலை. ஒவ்வொரு கூட்டமைப்பிலும் பெரிய ஆட்கள் கொளத்தூர் மணி, பாவேந்தன் போன்றவர்களை முன்னிறுத்தி தனது வேலைகளை பின்னால் இருந்து செய்துவிட்டு செல்வார் இந்த அருண்சோரி. அணு உலைக்கு எதிரான கூட்டமைப்பிலும் இப்படியே செய்தார்கள், இதில் மேலும் நகைப்புக் குரிய விசயம் என்றால் இடிந்தகரைக்கு சென்று அங்கு போராடி கொண்டிருப்பவர்களிடம் தலைமை சரியில்லை மாற்ற வேண்டும் என்று சொன்னது தான். இப்படி இவர் செய்த தகிடுதித்தங்கள் பல. ஆனால் முதன் முதலாக ஜுன் 26 நினைவேந்தலுக்காக இவரை அனுகி கேட்டபொழுது கூட்டமைப்புகள் மீது நம்பிக்கை இல்லை என்று என்னிடமே நேரடியாக சொன்னவர் தான் இவர்.

முத்துகுமாரின் மறைவிற்கு பின் முத்துகுமார் இளைஞர் எழுச்சி பாசறை என்று தமிழகம் முழுவது 120 பேர் இணைந்து உருவாக்கி 2009 தேர்தலில் காங்கிரஸுக்கு எதிராக வேலை பார்த்தனர். ஏன் காரைக்குடியில் இன்று நாம் தமிழரில் இருக்கும் ராஜிவ்காந்தி அவர்களை வேட்பாளராக சிதம்பரத்திற்கு எதிராக நிறுத்தி காங்கிரஸ் எதிர்ப்பு பிரசாரம் செய்தார்கள். அப்பொழுது அருண்சோரி, சதீஸ், பாலன் போன்றோர் ஒட்டரசியல் நமது நோக்கம் அல்ல என்று சொல்லி ராஜிவ்காந்தியின் சின்னத்தை சொல்லாமல் சிதம்பரத்திற்கு எதிராக மட்டும் பிரசாரம் செய்யவேண்டும் என்று சொல்லி செயல்பட்டார்கள். ராஜிவ்காந்தியின் சின்னம் என்ன என்று யாருக்குமே தெரியாமல் தான் இருந்தது கடைசிவரை. இப்படி நடைபெற்ற பிரசாரத்தின் வாயிலாக தான் அன்று தோல்வியுற்ற சிதம்பரம் குறுக்குவழியில் வெற்றிபெற்றதாக அறிவிக்கப்பட்டு இன்று அமைச்சராக இருக்கிறார். இப்படி மிகப்பெரும் சாதனை செய்த முத்துகுமார் இளைஞர் எழுச்சி பாசறையும் அதன் உறுப்பினர்களும் இன்று எங்கிருக்கிறார்கள் என்பது தெரியாமல் போனது அருண்சோரியின் ஆக மிகச்சிறந்த பணியாகும்.

இப்படி பல கூட்டமைப்புகளை சரியான முறையில் செயல்படவிடாமல் முன்னின்று அந்த கூட்டமைப்புகளை இழுத்து முடுவது, அதில் மே 17 இயக்கம் இருந்தால் அவர்களை எப்படியாவது ஓரம் கட்டுவது. தியாகு தோழர் உண்ணாவிரதம் ஆரம்பித்த பொழுது கூட்டமைப்பிற்கு அழைப்பு விடுக்கவில்லை தியாகு தோழர் முதல் முறை கைது செய்யப் பட்ட அன்று ஒரு அலோசனை கூட்டம் நடைபெற்றது அதில் ம.ஜ.க அமைப்பை சேர்ந்த தோழர் டெசோ அமைப்பினர் வந்தால் அவர்களை கூட்டமைப்பில் சேர்ப்பீர்களா என்று கேட்ட பொழுது சேவ் தமிழ்ஸ் செந்தில் கோரிக்கை தான் முக்கியம் யார் வந்தாலும் இணைத்துக் கொள்வோம் என்று சொல்லி இருக்கிறார். இதற்கு முன்பாகவே 3ம் தேதி டிகேஎஸ் இளங்கோவனும் பொன்முடியும் தியாகுவின் உண்ணாவிரதத்திற்கு எழுந்தருளி ஆசிர்வாதம் செய்து சென்றனர்..

டெசோவின் தலைவர் ஆகஸ்ட் 18ம் தேதியே தோழர் தியாகுவின் முதன்மை கோரிக்கையை கேட்காமல் இந்தியா பங்கேற்க கூடாது என்ற தேர்வு(choice) கோரிக்கையை தான் முன்னிறுத்தினார். அவர்கள் எப்படி ஒத்த கருத்துடையவர்களாக இவர்களுக்கு தெரிந்தது என்பது யாருக்கும் புரியாத புதிர். இப்படி தோழர் தியாகுவின் போராட்ட நோக்கத்தை கருணாநிதியிடம் அடகு வைத்தார்கள், ஆனால் வட்டியை ஜெயலலிதா இவர்களுக்கு தெரிந்தோ தெரியாமலோ இன்று தனது பிரதமருக்கு எழுதிய கடிதம் மூலமாக வசூலித்து விட்டார்.

அருண் சோரியின் சில நடவடிக்கைகள் அதுவும் இங்கு கோரிக்கை சார்ந்த நடவடிக்கைகளை அதில் நடத்திய தில்லாங்கடிகளை மட்டுமே இங்கு பகிர்ந்துள்ளேன். தமிழினம் சார்ந்த பலவற்றில் இவருடன் சேர்ந்து தமிழனாக நிற்க முடியாமல் போனதற்கு பல காரணங்கள் உள்ளன அது மற்றொரு சமயத்தில்..

இப்பொழுது நெடுமாறன் அய்யாவின் முள்ளிவாய்க்கல் முற்றம் நிகழ்விலும் உள்ளே நுழைந்து இருப்பதாக அறிகிறேன்.. அதுவும் மாணவர்கள் பங்கேற்கும் சுடர் பயணத்தில் இவருக்கு என்ன வேலை என்பது எனக்கும் புரியவில்லை. இவர்களுடன் சேர்ந்து கொண்டு தான் மாணவர் போராட்டத்தில் இயக்கங்கள் தலையிடுகின்றன என்று சில காலம் முன்பாக நடந்த மாணவர் போராட்டத்தின் போது குற்றம் சாட்டினர். ஆனால் அன்று அங்கு மாணவர் போராட்டத்தில் உதவி செய்த மற்ற இயக்கத்தினர் யாரும் மாணவர் அமைப்பை தங்கள் இயக்கத்துடன் இணைத்துக் கொள்ளவில்லை. தமிழீழத்திற்கான மாணவர் போராட்ட குழு இன்று தமிழ்நாடு மக்கள் கட்சியின் மாணவர் கிளையாக செயல்படுகிறது..

கடைசியாக கொசுறு செய்தி… ஒரு பக்கம் நெடுமாறன் அய்யாவை விமர்சித்துக் கொண்டே மறுபக்கம் இவர்கள் சுடர் பயணத்தை முன்னெடுக்கிறார்கள் வாழ்க இவர்களின் மாற்றத்திற்கான மாற்று அரசியல்…..

இதை பார்த்துவிட்டு மக்கள் இயக்கங்களின் ஒற்றுமையே என்று சொல்பவர்கள் ஏன் அனைத்து இயக்கங்களையும் தோழர் தியாகுவின் உண்ணாவிரதத்தில் இணைக்கவில்லை என்று கேள்வி கேட்டால் என்னால் பதில் சொல்ல முடியாது... அவர்களாலும் பதில் சொல்ல முடியாது இதை தான் பாவேந்தன் அய்யாவிடம் கேள்வியாக வைத்தேன் இன்று வரை பதில் இல்லை... 

மாற்று அரசியலும் மாற்ற கிளம்பிய மன்னார்களும் - பகுதி 2

பகுதி 2..

முதலில் பழைய விசயங்களை திரும்ப பார்ப்போம் தோழர் தியாகு மிகப் பெரிய அறிவுஜிவியாக தமிழ் தேசிய கருத்தியலாக்கத்தில் உலாவியவர். அவர் ஒரு உண்ணாவிரதத்தை இங்கு இருக்கும் பல தமிழர் நலன் சார்ந்த இயக்கங்களும் கட்சிகளும் ஏன் தீவிர தமிழ் தேசிய இயக்கங்களும் கேட்டு கொண்டபொழுது உண்ணாவிரதத்தை கைவிட மறுத்தார். நான் ஆரம்பித்த போராட்டத்தை நீங்கள் கையில் எடுத்து வீரிய படுத்துங்கள் என்றார் அனைவரும் செவி சாய்த்து அதற்கான வேலையில் ஈடுபட்டோம் ஆனால் அவர் இவர்கள் எல்லாம் தேவையில்லை என்று அவரின் முதல் கோரிக்கையான. “இலங்கையில் காமென்வெல்த் மாநாடு நடக்க கூடாது” என்ற கோரிக்கையை தொலைத்துவிட்டாரோ என்று நினைக்க தோன்றுகிறது இன்று எனென்றால் உங்கள் கோரிக்கையை சிரமேற்கொண்டு நாங்கள் போராடுகிறோம் என்ற சொன்ன இயக்கங்களின் கோரிக்கையை மறுத்துவிட்டு.

ஒரு கடிதம் வந்த பிறகு தனது போராட்டத்தை முடித்துக் கொண்டார் மகிழ்ச்சியே எதோ ஒரு உயிர் காப்பாற்றப்பட்டிருக்கிறதே இது வரை. எனென்றால் முத்துகுமாரில் இருந்து விஜயராஜ் வரை இழப்புகளேயே சந்தித்து வந்த நமக்கு இது மகிழ்வான விசயமே. ஆனால் முடித்து கொண்ட உண்ணாவிரதத்தை இத்தனை நாள் தன்னுடன் இரவும் பகலும் உடன் இருந்தவர்களை வைத்து முடித்துக் கொள்ளவில்லை, திமுக கூட்டணி உறுப்பினர்களை முன்னிறுத்தி முடித்துக் கொண்டார். இது நன்றாகவே இருக்கிறது தொடரட்டும் அவரது பணி திமுகவுடன்.

நாம் நம் பணியை தொடருவோம் தமிழ் தேசியத்திற்கான பாதையில்…

அடுத்த ஆள் அருண் சோரி இவருடன் எனது முதல் சந்திப்பு நியாபகம் இல்லை மிகவும் அருமையான தோழர். தனது சொந்த வாழ்க்கையை பணையம் வைத்து இன்றுவரை களம் காண்பவர். ஆனால் எனக்கு புரியாதது ராஜ்குமார் பழனிசாமி மே 17 அன்று நடத்திய நினைவேந்தல் நிகழ்வில் எந்த கட்சி மதம் சாதி பார்க்காமல் கலந்து கொண்டோம் பலர். அது திருமுருகனுக்கும் உத்வேகமாக அமைந்தது அன்று அடுத்த வருடம் இதே நாளில் மிகப்பெரிய ஒன்றுகூடலை ஈழத்தமிழ் மக்களுக்கு நினைவேந்தலாக சமர்பிக்க வேண்டும் என்று வெளியிட்டார். ஆனால் மறு நாள் காட்சிகள் மாறியது வெகு சீக்கிரத்தில் அதை நடத்த வேண்டும் என்று அவர் அழைத்த அழைப்பை ஏற்றுக்கொண்டு கலந்தாய்வுக்கு வந்த ஒரு 15 பேர் ஏற்றுக் கொண்டோம். ஆனால் அவர்களின் முகம் எனக்கு நியாபகம் இல்லை அவர்களை அன்று தான் கடைசியாக பார்த்தோம், ஆனால் பணி தொடர்ந்தது. அன்று நான் மே 17 இயக்க உறுப்பினர் கிடையாது.

ஆனால் இப்படி ஒரு நிகழ்வு தேவை தமிழ் சமூகத்திற்கு அதுவும் பொது மக்கள் கலந்து கொள்ளும் நிகழ்வாக நடத்தவேண்டும் என்ற வெறி இருந்தது அனைத்து இயக்கங்களையும் இதில் பங்குகொள்ள முதலில் அழைக்க வேண்டும் என்று முடிவெடுத்தோம். அதில் பேச வேண்டிய பொறுப்பை செய்து கொண்டிருந்த பொழுது மே 17 இயக்கம் நடத்திய ஒரு கருத்தரங்கில் தற்செயலாக இல்லை, அதற்கு முன்பே நான் அருண் சோரியை அவரின் கைபேசி எண்ணில் தொடர்பு கொண்ட பொழுது அந்த கருத்தரங்கம் வருகிறேன் அங்கு பேசலாம் என்றார். அன்று அவரின் இயக்கத்தின் பெயர் தமிழர் இளைஞர் எழுச்சி பாசறை.. இதற்கு முன்பு முத்துகுமார் இளைஞர் எழுச்சி பாசறையை காயடித்த இதே அருண்சோரியின் கதையெல்லாம் எனக்கு தெரிந்தாலும் இவரையும் இணைத்து மேற்கொள்ளுவோம் என்று அழைக்க போன பொழுது தான் இது நடந்தது.

ஆம் மே 17 இயக்க கருத்தரங்குக்கு சொன்னது போல் வந்தார் அப்பொழுது ஜூன் 26ம் தேதி நினைவேந்தல் நடத்தலாம் என்று இருக்கிறோம் நீங்களும் இணைய வேண்டும் என்று சொன்னேன். அதற்கு அருண் சோரி சொன்னார் மே 17 இயக்கம் இதை நடத்தப்போகிறது இதில் நான் ஏன் இணைய வேண்டும் என்று கேட்டார். அதற்கு நானும் மே 17 இயக்கம் கிடையாது காரியத்தை மட்டும் பார்ப்போம் என்றேன், இல்லை சரிவராது என்றார். சரி மே 17 என்பதற்கு பதிலாக ஒரு கூட்டமைப்பு ஏற்படுத்தி அதன் கீழ் பணி புரிவோம் என்றேன். அப்பொழுது அருண் சோரி நான் ஏகப்பட்ட கூட்டமைப்பு பார்த்துவிட்டேன் அதில் எல்லாம் எனக்கு நம்பிக்கை இல்லை என்றார். இது நடந்தது மே மாதம் 2011ம் ஆண்டு அதன் பிறகு தமிழகத்தில் பல கூட்டமைப்பு ஏற்பாடு செய்யப்பட்டது அனைத்திலும் இவர் தான் முதல் ஆளாக இருப்பார் மைக்கை பிடித்துக் கொண்டு.

2011 மே மாதம் கூட்டமைப்பில் நம்பிக்கை இல்லாத இவர் அதன் பிறகு எப்படி கூட்டமைப்பில் நம்பிக்கை வைத்து அனைத்து கூட்டமைப்பு போராட்டங்களில் மைக்கை பிடிக்கிறார் என்பது அவருக்கே வெளிச்சம். ஆனால் எனக்கு தெரிந்தது வேறு ஏனென்றால் இதை போன்ற கூட்டமைப்பு கூட்டத்தில் பங்கு கொண்டவன் அதுவும் சென்னையில் இருந்து திருச்சி வரை சென்று இவர்கள் நடத்திய கூட்டமைப்பு கூட்டத்தில் பங்கு கொண்டவன் ஒவ்வொரு கூட்டமைப்பிலும் ஒரு காலம் வரை அதாவது தியாகு உண்ணாவிரதத்திற்கு முன்பு அனைத்து கூட்டமைப்பிலும் மே 17 இயக்கம் கூப்பிட்டு கலந்துரையாடுவார்கள். ஆனால் இந்த தியாகு உண்ணாவிரதத்தில் மே 17 இயக்கம் இல்லை…

ஆம் முதலில் தியாகு அவர்கள் உண்ணாவிரதம் இருக்க போகிறேன் அறுவித்தது தமிழ் தேசிய விடுதலை இயக்கதின் பெயரில்.. அப்படியே நடந்திருந்தால் நன்றாக இருந்திருக்கும் ஆனால் அதன் பிறகு இலங்கையில் காமென்வெல்த் மாநாட்டை நடத்தாதே என்று சொல்லி ஒரு இயக்கம் ஆரம்பிக்கப்பட்டது ஆனால் அந்த இயக்கம் இந்த கோரிக்கையில் நிலையாக நிற்கிறதா என்றால் இல்லை…


இன்னும் தொடரும்..

மேலே இருக்கும் படத்தில் இருப்பது தமிழ்நாடு மக்கள் கட்சியின் ஒருவரான திவ்யா நடத்தும் மாணவர் இயக்கம். அதில் இலங்கையில் நடக்கும் பொதுநலவாய மாநாட்டை இந்திய புறக்கணிக்க வேண்டும் என்று தான் இருக்கிறது. இதில் இந்தியா புறக்கணிக்க வேண்டும் என்ற பேச்சுக்கும் ஒட்டுமொத்தமாக காமன்வெல்த் மாநாடு நடக்க கூடாது இலங்கையில் என்பதற்கு வேறுபாடுகள் உள்ளது.

அனைத்தையும் தாண்டி மாநாடு நடந்தால் அடுத்த இரண்டு வருடத்திற்கு ராஜபக்சே தான் தலைவர், இனப்படுகொலை செய்த ஒருவரை அனைத்து நாடுகளும் வரவேற்கும் நிலைக்கு தள்ளப்படுவோம். இதை உணர்ந்தவர்கள் தான் நாம் ஆனால் ஆதரிக்க கோருபவர்களை பிறகு பார்க்கலாம்..

இவர்களின் கோரிக்கை இந்தியா கமென்வெல்த் மாநாடை புறக்கணிக்க வேண்டும் என்பது தான்.. கருணாநிதியும் அதையே தான் வலியுறுத்தி வருகிறார் இவர்கள் இருவருக்கும் என்ன வித்தியாசம்... 

மாற்று அரசியலும் மாற்ற கிளம்பிய மன்னார்களும்..பகுதி 1

எளியவர்களில் சொல் அம்பலம் ஏறாது என்பது ஒரு பழைய வழக்கு, இந்த வழக்கின் அடிப்படையில் தான் தமிழ்நாட்டு அரசியலும் பல்லாண்டுகளாக நடந்து கொண்டுள்ளது. அதுவும் எம்.ஜி.ஆர் ஆட்சிக்கு வந்த பிறகு இந்த பழைய வழக்கு திமுக மற்றும் அதிமுக கட்சிகளுக்கு மிகவும் அருமையான வாய்ப்பாக மாறியது. அதாவது இவர்கள் இருவரும் ஒருவரை ஒருவர் தாக்கிக் கொள்வார்கள்,

எம்.ஜி.ஆர் ஆட்சியில் இருந்த வரை அதாவது அவர் ஆட்சியை கைப்பற்றி சாகும் வரை கருணாநிதிக்கு எதிர் அரசியல் என்பது வெறும் அறிக்கைகள் மட்டுமே. அதாவது தமிழகத்தின் தன்னையும் தன் கட்சியையும் தக்கவைத்துக் கொள்ள எம்.ஜி.ஆர் காலையில் எழுந்து காலை கடன் கழிக்கவில்லை என்று செய்தி வந்தால் கூட அதற்கும் அறிக்கை விடுவார். ”ஒரு மாநில முதல்வர் வாங்கிய கடனை காலையில் திரும்ப கொடுக்கவிடீல் நாட்டில் எப்படி சட்டம் ஒழுங்கு சரியாக இருக்கும்” என்று. இது செய்தி தாள்களில் ஊடகங்களில் வெளிவரும் பாவம் அவர்களும் என்ன செய்வார்கள் இவர்களை தவிர வேறு அரசியல் தலைவர்கள் இல்லாத நேரத்தில் அதுவும் எம்.ஜி.ஆர் தன்னை எதிர்க்க வேண்டும் என்று ஒருவர் நினைத்தாலே ஒன்று வளைத்துப் போடுவார், இல்லையென்றால் போட்டுவிட்டு வளைப்பார் அவர் குடும்பத்தை.

இத்தகைய கட்டத்தில் அறிக்கைகள் தான் மக்களுக்கு தமிழகத்தின் வருங்காலத்தை நோக்கிய அரசியலாக பார்க்க ஆரம்பித்துவிட்டனர். எம்.ஜி.ஆரின் மறைவிற்குப் பிறகு ஜெயலலிதாவும் இதே அரசியலை தான் கையில் எடுத்தார். ஜானகியும் இவரும் சேர்ந்து அடித்த கூத்துகள் முடிந்து ஓரமாக ஒதுக்கி வைக்கப்பட்டிருந்த கருணாநிதி அரியணை ஏறினார். இவரின் ஒவ்வொரு நடவடிக்கையையும் விமர்சிப்பதே தமிழக மக்களுக்கான அரசியல் என்று கடைசி வரை எதிர்கட்சியாக இருந்தபொழுது எந்த விதமான போராட்டங்களை முன்னெடுக்காமல், வெறும் அறிக்கை போரிலும், ராஜிவ் காந்தியின் மரணம் எனும் சித்துவிளையாட்டால் கிடைத்த அனுதாபத்தையும் தனதாக்கிக் கொண்டு முதல்வர் ஆனார் அதுவும் ஆகப்பெறும் எதிர்கட்சியாக இருந்த திமுக இரண்டு இடங்களில் மட்டும் தான் வெற்றி பெற்றது, ஆளுங்கட்சியின் கூட்டணி கட்சி எதிர்கட்சியாக அமர்ந்தது.

இதன் பிறகு கருணாநிதியும் அவர் கட்சியின் இருப்பும் திரும்பவும் சந்தேகத்துக்கு இடமானது தோழர் வைகோ அவர்களை வெளியேற்றியதால் ஆனால் அசராமல் அறிக்கை போரை மட்டும் திரும்பவும் நடத்தி மறுபடியும் ஆட்சியை பிடித்தார், ஜெயலலிதாவை தோற்கடித்தார். இப்படி தான் கடந்த 22 ஆண்டு காலமாக தமிழக அரசியல் ஒருவர் கையை விட்டு அடுத்தவர் கைக்கு என்று மாறிக் கொண்டிருக்கிறது. இப்படி அறிக்கை விடுவதையே அரசியலாக மாறிய பின் மக்களும் இந்த தலைவர்களின் அறிக்கைகள் தான் தங்களின் தலையெழுத்தை நிர்ணயிக்கிறது என்று இவர்களின் குரல்களை அறிக்கை வாயிலாக கேட்க ஆரம்பித்துவிட்டனர்.

அப்படித்தான் ஈழத்தில் 2009ல் ஒரு இனப்படுகொலை நடந்த பொழுது அன்று முதல்வராக இருந்தவர் ஈழத் தமிழ் மக்கள் மீது அக்கரை இருந்தால் இராமஸ்வரம் சென்று நீந்தி போய் அங்கு போராடுங்கள் என்றார். ஜெயலலிதாவும் போர் என்றால் மக்கள் சாகத்தான் செய்வார்கள் என்று ஒரு இனப்படுகொலையை நியாயைப் படுத்தினார். சாதரண அப்பாவி மக்களுக்கு என்ன புரியும் அவர்கள் தான் இங்கிருக்கும் தொலைகாட்சியில் வரும் செய்திகளை மட்டும் பார்த்துக் கொண்டிருந்தனர். ஆனால் கணிணி மற்றும் இணைய வசதி படைத்த இளம் தலைமுறை அங்கு நடந்த கோரங்களை பார்த்து வெறுப்புற்று மாற்று அரசியல் படைக்க கிளம்பிற்று. ஆனால் அப்படி கிளம்பிய இளைஞர் கூட்டம் இன்று தறிகெட்டு தள்ளாடி நிற்கிறது. இதே வல்லவன் வகுத்ததே சட்டம் என்பது போல் கருணாநிதியும் ஜெயலலிதாவும் கொடுக்கும் அறிக்கைகளினால் தான் எடுக்கும் நடவடிக்கையை மக்களிடம் கொண்டு சேர்க்க முடியாமல்.

தோழர் தியாகு அவர்கள் உண்ணாவிரதத்தை முடித்துக் கொண்டார் இதையே தான் கடந்த ஞாயிற்றுக் கிழமை அனைவரும் விரும்பினோம் அவரிடமும் சொன்னோம் ஆனால் அதையெல்லாம் கேட்கவில்லை அவர். போராடுங்கள் மத்திய அரசுக்கு நிர்பந்தம் கொடுங்கள் என்று தான் கொண்ட கொள்கையில் விடாமல் நின்றார். ஆமாம் அவர் வைத்த முதலும் முக்கியமான கோரிக்கை “இலங்கையில் காமென் வெல்த் மாநாடு நடத்தக் கூடாது இதை இந்திய மத்திய அரசு உறுதி செய்ய வேண்டும்” ஆனால் இந்த கோரிக்கையை திரிக்கும் வேலை சரியாக செய்யப்பட்டுள்ளது. கருணாநிதியின் அறிக்கையை தமிழர்களின் அரசியலாக பார்த்த மக்கள் கடந்த மார்ச் மாதமும் அதற்கு சரியாக ஒரு வருடம் முன்பாக நடந்த ஐ.நா மனித உரிமை கூட்டத்தில் சமர்பிக்கப்பட்ட அறிக்கையை இந்தியா ஆதரிக்க வேண்டும் என்றார்கள். ஆதாவது அந்த அறிக்கை இலங்கை அரசை கண்டிக்கிறது தமிழ் மக்களுக்கு நன்மை செய்ய வலியுறுத்துகிறது என்ற போலி பிம்பம் உருவாக்கியது. கருணாநிதியின் இந்தியா அமெரிக்க தீர்மானத்தை ஆதரிக்க வேண்டும் என்று கோரி வைத்த வேண்டுதல் அறிக்கை.

ஆனால் அந்த அமெரிக்க தீர்மானம் நமக்கு தேவையில்லை அது அங்கிருக்கும் ஈழத் தமிழர்களுக்கு எந்த நன்மையை கொடுக்காது என்று சென்றவருடமும் சரி இந்த கடந்த மார்ச் மாதமும் சரி எதிர்ப்பு தெரிவித்தவர்கள் மே 17 இயக்கும் தோழர் தியாகு அவர்களும் தான். கடந்த வருடம் பெரிய அளவில் இவர்கள் இருவரின் கருத்துக்கள் எடுபடவில்லை எனினும் இந்தியா இலங்கைக்கு எதிராக வாக்களிக்கிறேன் என்று சொல்லி இலங்கைக்கு ஆதரவான தீர்மானத்தை வெற்றி பெறச்செய்தது. அது இந்த வருடமும் அதே போல் செய்ய நினைத்த பொழுது திரும்பவும் கடுமையாக அமெரிக்க தீர்மானத்தை எதிர்த்தவர்கள் மே17 இயக்கமும் தோழர் தியாகுவும் தான். அப்பொழுது தான் மாணவர் போராட்டமும் வெடித்தது அப்பொழுது கருணாநிதி அமெரிக்க தீர்மானத்தில் திருத்தங்கள் கொண்டு வரப்பட வேண்டும் என்று தனது பேச்சை மாற்றி தானே தனது வேட்டியை அவிழ்த்துக் கொண்டு அம்பலம் ஆனார்.

இப்படி சாதனைகள் படைக்க காரணமாக ஒரு காரணியாக இருந்த தியாகுவே இன்று பலிகடாவாகி போனார். ஆம் ஞாயிற்றுக் கிழமை அனைத்து இயக்கங்கள் கட்சிகள் வேண்டுகோள் வைத்து கேட்ட பொழுது பரிசீலிக்கிறேன் போராட்டங்களை தொடருங்கள் என்றவர். மறுநாளும் அதற்கடுத்த நாளும் கருணாநிதியின் நாடகத்தில் ஒரங்க கதாபாத்திரமாக மாறிவிட்டார். ஆம் உண்ணாவிரதம் முடித்தது தாய் தமிழ் பள்ளிக் குழந்தைகள் கொடுத்த பழரசத்தை அருந்தி தான் என்றாலும் இருபக்கமும் திமுக கூட்டணி அங்கத்தினர்களே காட்சியளித்து பாமர மக்களிடம் எதோ கருணாநிதி பிரதமரிடம் சொல்லி, பிரதமர் கருணாநிதியிடம் வேண்டுகோள் வைத்து உண்ணாவிரதத்தை முடித்து வைத்தது போல் இந்த புகைப்படம் பல நூற்றாண்டுகளுக்கு கதை சொல்லும் என்பதை உணராமல் போய்விட்டாரா தோழர் தியாகு.

ஆம் இவரின் தூக்கு கயிற்றை அறுக்க பல போராட்டங்களை நடத்தினர் இவரின் சகோதரி காந்திமதி, மேலும் பலரும் இவருடன் நின்று போராடினார்கள். அவர்களில் ஒருவர் தான் (நாளை இவரின் பெயரை பதிகிறேன், நியாபகம் இல்லை சில புத்தகங்களை பார்க்க வேண்டியது உள்ளது.. ஆனால் இந்த கட்டுரையை பதிய வேண்டிய தேவை உள்ளது) அன்று ஒரு லட்சம் மக்களை கூட்டி அவர்களிடம் கையெழுத்து வாங்கி அதை கருணை மனுவாக சமர்ப்பித்தனர் அந்த கருணை மனுவின் அடிப்படையிலேயே மரணதண்டனை ரத்து செய்யப்பட்டது. ஆனால் அதை அப்பொழுது இருந்த முதல்வருக்கு தான் மரணதண்டனையை ரத்து செய்ய தகுதி இருக்கிறது என்று பொய்யான பரப்புரையை செய்து கொண்டு இருக்கிறார்கள் இதையெல்லாம் மேடைகளில் பேசிய தியாகு இன்று இதற்கே அடிமையாகிவிட்டாரோ… (இதில் தோழர் தியாகு கருணை மனு அனுப்பினார் என்பது கொசுறு தகவல்.. இன்னும் உறுதி செய்யவில்லை. ஆனால் அப்படி அனுப்பாமல் இருந்தது புலவர் கலியப்பெருமாள், செவ்வணக்கம் அவருக்கு)

இன்னும் தொடரும்…

இந்த உண்ணாவிரதம் ஒரு மைல் கல் நடந்து முடிந்த வரலாற்றை அதுவும் பலருக்கு தெரியாத வரலாற்றை சொல்லும்… அது மட்டுமல்ல நாம் நம்புவர்கள் கழுத்தறுக்கும் வரலாற்றை சொல்லும்…

இன்னும் வர இருப்பவர்கள்..

தோழர் அருண் சோரி

தோழர் மதியவன்

தோழர் ஜெயபிரகாசு நாரயணன்

தோழர் குணா

தோழர் செந்தில்

தோழர் தோழர் என்று மற்றும் பலர்… 

மருதுபாண்டியன் உட்பட… இந்த கடைசி நபரை தோழர் என்று கூப்பிட மாட்டேன்..